بعد هجومها على «أبو تورتة»..بنات تويتر: اللى هيزعلنا هنجيبله رضوى الشربينى

اكتسبت الإعلامية رضوى الشربينى شهرة واسعة بسبب دفاعها المستميت عن المرأة من خلال برنامجها الذى أعد فى البداية لعرض فقرات عن كل ما يتعلق بالنساء خاصة الموضة، إلا أن مكالمة هاتفية غيرت مسار البرنامج إذ أبدت رأيها فى شكوى إحدى النساء عن علاقتها برجل فى حياتها ومن بعدها استقبلت العديد من المكالمات من نساء أخريات بعد أن وثقوا فيها وأصبح أمر معرفة رأيها أمرا ضروريا، وبالتالى اكتسب رضوى شهرة واسعة وأصبحت آرائها محط اهتمام المرأة حتى أن البعض اتهمها بمعاداة الرجل.

لم تفوت رضوى الشربينى فرصة التعليق على قصة مصطفى أبو تورتة حديث السوشيال ميديا، وأخذت تهاجم المدعو مصطفى أبو تورتة بعد قصته الشهيرة التى تداولها رواد مواقع التواصل الاجتماعى بعد خذل خطيبته وترك الفرح وأخذ معه التورتة وتركها فى الكوشة تنتظر عودته بحجة أن خاله "تعبان" وعقبت الشربينى، على الواقعة "مصطفى أبو تورتة"، قائلة له: "محدش علمك إن فى حاجة اسمها زى ما دخلنا بالمعروف نخرج بالمعروف، محدش علمك إن بيوت الناس ليها حرمة".

وتابعت "الشربينى"، خلال تقديم برنامجها "هى وبس"، المذاع عبر قناة "سى بى سى": "محدش علمك الفرق بين الراجل ورجل الكنبة، دينك معلمكش فإمساك بمعروف أو تسريح بإحسان، متعلمتش إن نهاية العلاقة لازم يكون فيها شرف وتكون بأدب يا محترم، واضح إن محدش علمك علشان ماما مشيت ورا خالك".

وأردفت الشربينى: "كنت عايز تعملها فضيحة بجلاجل، هو فى واحد يسيب خطيبته فى قاعة الفرح إلا لو فيها حاجة وعايز يكسر نفسها وقلبها، تسمع عن كدة ولا متسمعش يا أبو تورتة، الفضيحة إللى كنت عايز تعملهالها محصلتش ولكن ربنا رفع ستره عنك وخلاك يا أبو تورتة عبرة لمن يعتبر، إنت أخدت نصيبك منى ومن كل رجال ونساء وشباب الوطن العربى كله، إنت مش هتلاقى حد يتجوزك، لو بطة ماشية مش هترضى أصلًا تبصلك"، وتابعت موجهة حديثها لأهله وأصدقائه: "مفيش فرد واحد يقوله حرام عليك اتقى الله إحنا عندنا ولايا وبنات، مفيش حد فيكم عاقل وعنده رحمة وقلب يقوله ارحم البنت وسمعتها، يا نهار أبيض هو إحنا وصلنا لكده".

وانهالت التعليقات على فيديو رضوى الشربينى وهجومها على مصطفى أبو تورتة، وكتبت إحدى البنات: اللى هيزعلنا هنجيبله رضوى الشربينى، وكتب آخر: رضوى الشربينى هتعمل من مصطفى أبو تورتة بطاطس، وكتب مدونة: مصطفى أبو تورتة اتفضح على الفضائيات.

وتقول رواية "مصطفى أبو تورتة"، إنه ترك خطيبته يوم الخطبة فى القاعة، بعد أن أخذ "الشبكة" و"التورتة"، ولذلك أطلق عليه رود السوشيال ميديا "مصطفى أبو تورتة".