انهارت الفنانة نسمة عبد العزيز، عازفة الماريمبا، من البكاء أثناء حديثها عن فترة مرضها، حيث روت بعض التفاصيل، قائلة: تعبت فترة مكنتش عارفة عندى إيه وعملت عملية فى الرئة وشيلت جزءا كبيرا منها، وكانت المشكلة بعدها مش وقتها، وقعدت كتير مش بعزف خالص ومقدرش لغاية لما ربنا كرمنى وقدرت.
وأضافت خلال لقائها فى برنامج "معكم" للإعلامية منى الشاذلى المذاع على قناة cbc، أول ما خرجت من المستشفى وشُفت نور ربنا مصدقتش، وطلعت منها بدرس، فى أول فترة الناس بتسأل عليكى كتير، وبعد شوية بيزهقوا بقى، واللى بيفضلوا معاكى اللى بيحبوكى بجد ومش عاوزين منك حاجة غير أنهم بيحبوكى، فاتعلمت إن الحب ده قيمة مش طبيعية، ولازم تحبى اللى يحبوكى لأنهم يستاهلوا فعلا.
وتابعت، قعدت حوالى سنة بدون عزف على "الماريمبا"؛ لأن العملية أثرت على إيدى ومعنديش القدرة إنى أتحرك، وكانت حركتى قليلة جدا، موجهة حديثها للجمهور قائلة: الأمل حلو وخاصة لو جنبك حد بيسندك زى أمك أو إخواتك وأصدقائك المقربين، وأنا كان دايما أملى فى ربنا كل ما أشوف النهار أعرف إن أنا هارجع، والحمد لله بقيت بخير.
