أشرف عبد الباقى: "الارتجال موهبة لا يمتلكها الكل ومينفعش حد يعلمه لحد"

كشف الفنان أشرف عبد الباقى خلال لقائه في برنامج "its show time"، المذاع على قناة CbC، عن اعتماده على الارتجال وكواليس أعماله الأخيرة وظهوره كضيف شرف في مسلسل الاختيار 2، قائلا: "الارتجال موهبة من عند ربنا خلقها عند شخص ومش كل فنان بيقدر يرتجل وممكن فنانين كبار جدا ولو حد قال امامهم كلمة مرتجلة يتلخبط، عشان كده الارتجال لو عند ممثل محدد مش لازم يكون عند كل الفنانين ومينفعش حد يعلمه لحد".

وعن كواليس مشاركته في مسلسل الاختيار2 قال أشرف عبد الباقى: "أنا ظهرت ضيف شرف في الاختيار 2 عملت شخصية الشهيد اللواء محمد جبر مأمور قسم كرداسة، وهنا بنتكلم على نجاح شخصية أنا عملت، الموضوع بالنسبة ليا لا يعنى شيء لسبب بسيط لأن الشخصية الأصلية هي البطل وهو الأساس".

وتابع أشرف عبد الباقى: "البطولة اللى عملتها الشهيد اللواء محمد جبر هو اللى عملها وأنا مش بحس بأى حاجة مقابل اللى هو عمله، لأن أنا كل اللى عملته انى روحت يوم تصوير وقعدت في تكييف واتقالى يلا بينا يا أستاذ نصور وبس، فاللى احنا بنعمله ولا حاجة، ولما أطلب منى أعمل الدور رجعت لنفس الفيديوهات اللى كنت بشوفها قبل كده ورجعلى نفس حالة الحزن والبشاعة اللى كانت حاصلة في الوقت ده".

وعن مشاركته في فيلم سقراط ونبيلة قال أشرف عبد الباقى: "الفيلم لاتنين شباب عاملين فيلم أنا عامل معاهم دور صغير فيه، وزى ما بعمل في المسرح بعمل معاهم في السينما وبساعد معاهم وأنا بجسد دور والد نبيلة، وأتمنى أنهم ينجحوا"

وعن من يصلح لتجسيد سيرته الذاتية قال أشرف عبد الباقى: "أعتقد نجيب شخص يعمل شخصيتى وأنا صغير، والجزء وأنا كبير أنا اللى أعمله عشان حتى هيكون في مصداقية وقتها".