تعرضت أسما ابنة الفنان شريف منير وخطيبة الممثل محمود حجازى، الفترة الماضية لبعض التعليقات السلبية التى تناولت شكلها تحديدا.
وردت أسما على التعليقات التى تحدثت عن شكلها، وخصوصا حجم أنفها، حيث شاركت صورة لها عبر حسابها الشخصى على موقع تبادل الصور والفيديوهات الشهير "إنستجرام"، وعلقت عليها قائلة "أنا مناخيرى كبيرة آه وربنا شايف كده وخالقنى كده وقالى كمان إنه خلقنى فى أحسن تقويم، أتولد وكبرت وأهلى برضه شايفنى كده قوم إيه الواحد يطلع فى الدنيا مصدق إنه تمام يجى بقى الواقع يضربه على مناخيره وفجًّأة تصدق الناس وتتكسف من عيوبك وتفقد الثقة فى نفسك".
وأضافت "كتير بسبب إن مناخيرى كبيرة كنت بفقد الثقة بنفسى وكنت باقول لأهلى إنى عايزة أعمل فيها عملية بس دايماً كنت بخاف اعملها، وبعدين لما اتعلمت الميكب وبالذات الكنتور عرفت أصغرها بالميكب وده زودلى الثقة شوية وبعدين اتعلمت أصغرها فى الادتنج انشكحت اكتر، عشان الناس عنيفة فى رأيها فساعات بيهزنى وبتراوضنى فكرة العملية".
وأكملت أسما كلامها قائلة: "لحد ما قررت إنى أتصالح مع فكرة إن منخايرى كبيرة.. لقتها لايقة على وشى، ربنا شافها حلوة كدة وادانى حاجات تانية حلوة فى وشى.. وفجأة حصلى حالة تفكير وافتكرت إنى مش كاملة وإن عيوبى جزء منى والمفروض إنى أتعلَّم أحبها عشان مش الأسهل إنى أغيرها، تخيلت لو جالى لوحة من پيكاسو مثلاً هدية حتا لو معقده وفيها جزء مش عجبنى مش هجيب فرشة وألوان وأعدل عليها، محدش هيعمل كده طب إيه بقى".
واختتمت قائلة "أنا لسة بتعلم أحب نفسى بس بشكل صحى مش مريض وقلت لازم ابتدى فى علاجها بإنى أتكلم عنها بكل صدق وفى تصالح بس كده".
وكانت أسما شريف منير قد احتفلت بخطوبتها على الفنان محمود حجازي، بصحبة أصدقائهم وأصدقاء والد العروسة الفنان شريف منير فى أحد الكافيهات الشهيرة بمنطقة 6 أكتوبر، حيث حرص على حضور السهرة العديد من الفنانين أبرزهم أحمد زاهر وأمير كرارة وشيرى عادل، إلى جانب روجينا وأشرف زكى.
