لأول مرة سأتخلى عن الفصحى فى كتابة هذا المقال، وألجا لكتابته باللغة العامية كى تستطيع سما المصرى قراءة وفهم ومضمون المقال، وأغلب الظن أنها لن تفهم.
من السنة اللى فاتت وسما المصرى عمالة تحرن وتلف وتدور وتروج بالكدب إنها هتقدم برنامج دينى على الفضائيات فى رمضان، وهى لا هتقدم برنامج ولا حاجة ولا حد هيعبرها أصلا، بس هى مصرة تعمل كده عشان تلفت النظر ليها بعد فشلها فى كل حاجة سواء الرقص أو التمثيل، ومتصورة إنه باللى بتعمله ده حد ممكن يراهن عليها ويقول هاتوها نعمل بيها برنامج، ويتحقق غرضها، بس الحمد لله محدش هيبص لها ولا هيعبرها، والناس بقيت تشمئز منها، لأنها مستفزة وحاجة ماوصفتش فى الاستفزاز.
اللى مجنن سما المصرى ومخليها مش على بعضها، وبتعمل كل اللى بتعمله ده، ومهووسة بالشهرة، غيرتها من الراقصة صافيناز اللى كلت الجو منها، وشغالة ليل ونهار، منظمين الحفلات يجروا وراها، منتجين يتعاقدوا معاها فى أفلام، وبرضو الراقصة آلا كوشنير، اللى بترقص وبتمثل، وبتشتغل، وهى قاعدة محدش بيعبرها لا فى أفلام ولا حفلات ولا أى حاجة، عشان كده محصورة على روحها وهتموت من اللى شايفاه من الراقصات الأجانب اللى كلو الجو بجمالهن وحلاوتهن ورقصهن اللى يشيب.
سما المصرى هتموت وتبقى نجمة مشهورة، مايهمهاش تعمل ايه، المهم والغرض والهدف تبقى نجمة معروفة وخلاص، سواء بقى من خلال الرقص أو التمثيل أو البرامج أو أى حاجة، المهم تتشهر وخلاص، وممكن تدفع نص عمرها عشان تحقق الرغبة دى، لانها لا شغلة ولا مشغلة، ولا وراها حاجة بس عمرها ما هتكون حاجة.
