بعد ساعات من تقديم الفنان هانى شاكر بلاغًا رسميًا ضد مغنى المهرجانات حمو بيكا، اليوم الخميس، يتهمه فيه بالسب والقذف، وتهديده باقتحام مقر النقابة بمعاونة عدد من البلطجية – بحسب البلاغ – نشر بيكا مقطع فيديو كرر فيه اعتذاره للنجم هانى شاكر على ما بدر منه داخل مقر النقابة واصفا إياه بأمير الغناء العربى.
وقال حمو بيكا فى الفيديو: "انا بتأسفلك يا أستاذ هانى شاكر انت امير الغناء العربي، وأنا مكنش قصدى إنى أزعلك، كان كل هدفى إنى أكل عيش، أنا معايا 20 فرد بياكلوا عيش، ناس فاتحة بيوت وبتصرف على عائلاتها، أنا اللى خلانى اضايقت وأنزل الفيديو أنى لفيت 8 ساعات، وشغلى كله كان واقف، وأنا إللى كنت عايز أعمله أنى امشى قانونى واعمل تصريح وأنزل أشتغل ومكنش قصدى أنى أزعلك أو اعمل حاجه".
وأضاف: "أنا بحبك واحنا عيالك يا استاذ هانى، انا كان كل هدفى انى صوتى يوصلك، وقدام الناس كلها بقولك أنا اسف ليك، ولو عايزنى أجيلك او أطلع على الهواء اتأسفلك هطلع، أنا بقالى 6 شهور واقف عن العمل، والناس اللى معايا مقدرش امشيهم، أحنا نروح فين دى بلدنا واحنا اخترنا فن الناس بتحبه وبتفرح بيه عمرنا ماضايقنا حد، وقدمنا محتوى تانى وبقينا ناخد بالنا من الكلام، وبقيت بنقى الكلام الصح".
وتابع: "فى شباب نفسها أنها تتجوز وتكون نفسها، كان يهمنا اننا نشتغل بالحلال، وانا تعبت وكافحت، ابويا ربانى وطلعنى انى مقولش لحد عايز حاجه، وبنيت المكان اللى بقيت فيه بعد سنين كتيرة، كان حلمى إنى أعمل حاجة والحمد لله حققت نسبة نجاح كبيرة، وبقى ليا أطفال وشباب وبنات كتيرة بتحبني".
وتسلم رئيس نيابة الدخيلة بلاغا رسميا يحمل رقم 13350 لسنة 2019 من المستشار ياسر قنطوش، وكيلا عن الفنان هانى شاكر بصفته نقيب المهن الموسيقية، ضد المدعو/ محمد محمود مصطفى محمد سيد أحمد وشهرته "حمو بيكا" لبثه مقطع فيديو على مواقع التواصل الاجتماعى يتضمن إهانة وسب وقذف ضد شخص وصفه شاكر، قال من خلاله حمو بيكا أنه لا يعترف بفن هانى شاكر، وادعى أن نقابة المهن الموسيقية طالبته بمبالغ مالية لقاء قيده بعضوية النقابة وهو "كلام مغلوط وعار عن الصحة" وفقا للبلاغ.