نجوم الفن يدعمون رامى جمال فى مرضه: "انت أقوى.. كمل غناء احنا معاك"

حرص عدد من نجوم الفن، على مسانده الفنان رامى جمال فى مرضه بعد إعلان إصابته بالبهاق، موجهين له رسائل دعم لتهوين عليه أزمته، ومطالبين استمراره فى الغناء وعدم الاعتزال.

وكتبت الفنان زينة، قائلة: "إنسان محترم ربنا يعفو عنك.. للأسف احنا فى دنيا مابترحمش والنَّاس بقت صعبة ياريت نحاول يكون فى قلوبنا رحمة...انت إنسان موهوب يمكن انا ماتشرفتش بمعرفتك بس قلبى معاك واوعى تفكر تتهزم ده مرض عادى وربنا يعفو عنك وقول الحمد لله والنَّاس الرحيمة كتير واعتبرنى من أهلك والإنسان بموهبته واحترامه وأخلاقه وبس". 

وقالت الفنانة سوسن بدر: "قدر الله وما شاء فعل الرضا بيشفينا بأذن الله".

ووجهت الفنانة لطيفة، رساله دعم لرامى، قائلة: "حبيب قلبى يا رامى يا مبدع يا محترم يا مختلف اوعى تفكر كده اول حاجه لازم تقول الحمدالله على كل حاجه ربنا يكتبها لنا تانى حاجه دى حاجه حصلت لناس كتير وتعالجت منها الحمد الله وبعدين احنا بنحبك على موهبتك وفنك الرائع وكل جمهورك وانا منهم بنبقى مستنيين جديدك دايما"، أما الفنان عمر السعيد، قال له:" بحبك زى ما انت ".

وقالت الفنانة إيمان العاصى، " حبيبى يا رامى انت اقوى من اى حاجه وفنان وموهوب ونجم وكل ده ولا حاجه قصاد نجاحك وحبك لفنك ربنا يقدرك على الناس عديمة الإحساس ربنا يخليلك ناريمان بالدنيا". 

وتمنى الفنان حمدى الميرغنى، الشفاء العاجل لرامى، قائلا: ربنا يشفيك يارامى ده مش حاجه اصلاً ده الصداع أصعب منه ياخويا الناس كلها بتحبك..وكل ماتشوفنى أحمد ربنا وأعرف انك فى نعمة"، فيما قالت له الفنانة إيمى سالم، " كمل واعمل اللى بتحبه واحنا معاك وفى ظهرك". 

كما كتب الفنان هشام جمال، قائلا:"عندى احساس من كلامك أن دى هتكون بداية مرحله كلها نجاح ونضوج وتركيز أن شاء الله الف مليون سلامه عليك يا رامى ومستنيين الأغانى الجديدة"، ليرد عليه رامى قائلا: "شكرًا يا هشام على كلامك الجميل قد ايه وجود المحترمين اللى زيك بيفرق فعلا بيكم بتهون".

وغرد الفنان أحمد جمال، قائلا: "سلامتك يا رامى يا حبيبى أولاً ربنا ما بيختارش غير الخير وتأكد أن كل اللى بيحصلنا فى الدنيا من تدبير ربنا ورحمته بينا ثانياً جمهورك اللى بيحبك هيفضل يحبك ومكمل معاك بأى شكل وف أى وقت ثالثاً وده الاهم مفيش " جمال " ضعيف كل عيلة جمال جامدين يلا يا بطل انا مستنى الألبوم"، ليرد عليه رامى قائلا:" كلامكم بيفرق والله انت مش فاهم انا قد ايه باخد طاقة إيجابية من المحترمين اللى زيك".

وكتب الفنان إيلى أبو نجم، " الطريق طويل.. ومعاك دايما هو الألبوم امتى يلا"، ومن جانبه رد رامى عليه، قائلا:" والله بتهون وتحلى بالناس اللى زيك".

و قد أعلن المطرب رامى جمال إصابته بمرض البهاق، بعد ظهور بقع بيضاء اللون بمناطق بجسده، دون أن يجد له علاجا، وقرر أن يشارك الجمهور الأمر ليضع حلين أمامه إما الاعتزال أو أن يتقبله الجمهور بهذا الشكل".