نشر الممثل وائل عبد العزيز شقيق الفنانة ياسمين عبد العزيز عبر حسابه على فيس بوك رسالة شديدة اللهجة انتقد فيه تصرفات ياسمين الأخيرة وعلاقتها بأحد الممثلين الشباب، وجاءت الرسالة كالتالى:
"بصي يا ياسمين يا عبد العزيز يا اختي :انا معاكي وفي ضهرك من وانتي صغيره شيلت مشاكل كتير بسببك من وانتي عيله صغيره بدايه من مشاكلك مع الشاعر وبراده وانتي عارفه ان انا اتاذيت فيها ازاي وقضيته الشغالات مؤخرا غير قضيه الضرب الي كانت بينك وبين بنت هشام سليم الممثله الي لبستيها التورته في وشها .. ووقفت جمبك بكل ما املك من قوه أدافع عنك في كل موقف صعب مر عليكي ونسيت حياتي ونفسي عشانك وبقي كل همي انا "ووالدتك " انك تكبري وتبقي نجمه في مجالك .. سيبنالك اختياراتك كلها لنفسك ووفقنالك علي معظم قراراتك وكنت الوحيد الي ساندتك ووقفت جنبك في طلاقك .. لكن هنهرتل وتروحي تعرفي واحد اصغر منك ب ١٠ سنين لا من سنك وتتصوري صور مالهاش اَي لازمه علي حساب سمعتك وسمعتنا لا ومحدش هيسمح .. من امتي واحنا بنعمل أعياد ميلاد وتنزل علي السوشيال ميديا .. من امتي الناس بتجيب في سيرتنا !؟ ونقعد نتعاكس علي السوشيال ميديا
ومع ذلك حياتك وانتي حره فيها .. انا هتكلم علي الشق الي يخصني .. انتي مقاطعه كل العيله عشان تعملي الي علي مزاجك .. احنا دالواقتي وعايزين نفهم العلاقه دي ايه و رايحه علي فين ..
اما بالنسبه للأخ الي ماشي وراكي في كل حته وشايفك البيضه الدهب الي هتفقسله كل يوم احب أقولك يا راجل لما تيجي تدخل بيت تدخله من بابه يا راجل !! وتقعد مع رجاله البيت !!..دي الأصول وده الاحترام .. وطبعا لانك عارف انك مرفوض رافضا باتا فا عمرك ما هتعمل ده ومعندكش غير طريق الشمال الي انت سالكه من سنين مع بنات الناس !!.. انا من راي كفايه عليك البطوله الي أخدتها والعربيه المرسيدس الهديه .. وتركز في شغلك وتسيبنا في حالنا لان طول عمرنا في حالنا ومحدش سامع عننا حاجه وملوش لازمه جو الصور والمعاكسات ده وانا مبخفش من تهديد حد !!".
وكان قد أشيع مؤخرا أن الفنانة ياسمين عبد العزيز دخلت فى علاقة حب مع أحد الفنانين الشباب، وذلك بعد إعلانها انفصالها عن زوجها، وتبادلا سويا التلميحات التى تعبر عن تلك العلاقة، خاصة بعد ظهورهما سويا فى حفل عيد ميلادها الأخير، حيث أظهرت خلاله علاقة حب من نوع خاص.
وفى اتصال مع وائل عبد العزيز شقيق ياسمين، أكد لـ"عين" أن الحساب حسابه، ولم يتعرض للقرصنة، وأن هذه هى رسالته لشقيقته ياسمين.
