اعتذر شقيق الملحن خالد عادل عن ظهور أخيه فى بث مباشر عبر صفحته الشخصية بموقع "فيسبوك"، واستغاثته بالنجم تامر حسنى لمساعدته، فى نقله إلى مستشفى أخري، حيث إنه محتجز حاليا بغرفة العناية المركزة، داخل أحد المستشفيات بمنطقة شبرا.
وكتب شقيق خالد عادل، عبر صفحته على "فيس بوك"، قائلاً: "يا جماعة انا باعتذر عن الفيديو اللى اخويا الملحن خالد عادل نزله من شوية على صفحته لان خالد اخويا عنده تسمم دموى حاد بسبب إلتهاب حاد برجله الشمال والتسمم الدموى ده بتكون أعراضه الهذيان وتخيلات وعدم وعى كامل وخلل فى عملية الادراك والنطق والاستاذ تامر حسنى وأخيه الاستاذ حسام حسنى متابع معانا الموقف لحظة بلحظة عشان يتم نقل اخويا الى الرعاية المركزة وبشكرهم جدااا جدااا على اهتمامهم بحالة اخويا وبوجه لهم كل الشكر والتقدير وباعتذر جدااا على الفيديو اللى نزل من اخويا لأن للاسف كنت سايب معاه الموبيل بتاعه وخرجت اكلم الدكتور لقيت الفيديو نزل وهو بيطلب من أصدقائه انهم يقفوا جنبه للاسف هو فى حالة لا وعى كامل ومفيش اى ادراك ذهنى عنده".
وكان الملحن خالد عادل قد قال فى مقطع فيديو له من داخل المستشفى: "أرجوكم يا جماعة الحقوني بسرعة، استغاثة، أرجوكم عاوز أخرج من المستشفى، تعبان جدا جدا، بتعرض لحاجات مش كويسة وهما عارفين يعالجونى، ممكن تساعدوني أخرج، بعد إذنكم يا جماعة، رجلى الشمال مبتمشيش، أنا لو أقدر أهرب ههرب، بس أنا مش عارف أهرب، لو سمحتوا أنا مش عاوز حد يعالجنى، أنا عاوز أطلع من هنا، أى فنان يساعدني، الحقوني أنا بموت".
وكان الفنان تامر حسنى قد أعلن تكفله بجميع مصاريف علاج الملحن خالد عادل، منذ فترة بعد تدهور حالته الصحية بشكل كبير ودخوله على أثرها إلى أحد المستشفيات.
وعانى الملحن خالد عادل من فشل كلوى، منذ حوالى 5 سنوات، كما لم تنجح عملية زرع كلى حاول إجراءها من قبل.