فى تقليد ظريف لمسحراتى رمضان، أبدع الفنان بديع خيرى على نفس نسق مسحراتى رمضان، مسحراتى الفن، وفيه يخاطب الفنانين ويدعوهم للسحور، وتناول فى مجلة الكواكب بالعدد الصادر عام 1954 حلقات مسحراتى الفن على لسان الفنان عبد الحميد زكى، لكل من: الفنان يوسف وهبى، الفنانة مديحة يسرى، الفنانة فاتن حمامة، الفنانة مريم فخر الدين، الفنانة ماجدة والفنان أنور وجدى.
فقد قال في سحور يوسف وهبي:
اصحى يا يوسف بيه .. النوم دا كله ليه
الصوم دا حق علينا .. وبكرا تجزي عليه
اصحى وادعي وقول .. يا رب يا موجود
تديم علينا الصحة .. وتبذل المجهود
وتخلّي مسرح مصر .. يصبح عليه القيمة
وتنصره يا رب .. علي الهبابة السيما
وتندر انك تفضل .. للفن دا خادم
ووحد الدايم
ــــــــــــــــــــــــــــ
للفنانة مديحة يسري
وانت يا ست مديحه .. خديها مني نصيحه
تصومي ولا تاكليش .. غلأأ يدوب ع الريحة
عشان تحافظي يا بنتي .. علي قوام الغيد
وبعد صوم رمضان .. تتهني بيوم العيد
وادعي واطلبلك .. يومي في كل مساء
انه يخليلك .. قرة عنيكي وفاء
ولا تتبليش يا اختي .. بلومة اللايم
ووحدي الدايم
ـــــــــــــــــــــــ
الفنان أنور وجدي
وانت يا سي أنور .. نايم وبتشخر
افرك عينيك يلا .. وقوم بقي اتسحر
خسيت في كار لسباد .. كيلو في تلات تشهر
لكن صيام رمضان .. هاتخس فيه اكتر
وانا راح ادعي واقول .. للخالق الرحمن
ترجع إليك ليلى .. وتبقوا زي زمان
ويرزقك مولود .. والخير يكون تامم
ووحد الدايم
ــــــــــــــــــــــــــــــــــ
الفنانة ماجدة
يا مزمزيل ماجدة .. عينيكي ليه ساهدة
وسابحة وي الليل .. وشمعتك قايده
يكفيكي شر العين .. الزايغة والحاسدة
ويخلّي نار العين .. على الشباب باردة
ويرزقك بعريس .. يكون على قدك
ويبقى طول العمر .. هو سبب سعدك
وتصلي وتصومي .. لربك العالم
ووحدي الدايم
ــــــــــــــــــــــــــــ
الفنانة فاتن حمامة
وانت يا فتونة .. بالظرف معجونة
أنا جاي أصحيكي .. دي الليلة ميمونة
وآدي السحور قرب .. وبكرة هتصومي
وربنا يقدر .. على الصيام يومي
وكل يوم هدعي .. في الفرض والسنة
إن شاالله تتحدفي في الآخرة على الجنة
دا بعد عمر طويل السعد فيه دايم
ووحدي الدايم
ـــــــــــــــــــــــــــ
الفنانة مريم فخر الدين
أما أنت يا مريم .. وربنا يعلم
في كل شهر كريم .. تصومي يا مريم
والاسم حتى كمان .. مريم وفخر الدين
قومي سحري محمود .. وابقوا سوا صايمين
وإن شالله يا الهي .. يديم عليكوا الستر
وتكملوا صيامكم لحد آخر الشهر
ويا رب يكفيكم .. عينين عزول ظالم
ووحدي الدايم
..ـــــــــــــــــــ
ومن خلال هذه الأبيات الزجلية يكشف بديع خيرى عن خفة ظله جعلته على قمة ظرفاء عصره.
.jpeg "بديع خيري (1)")
بديع خيرى
.jpeg "بديع خيري (2)")
بديع خيرى