أكد المطرب محمود العسيلى، أنه من عشاق شرب الشيشة، ولكن لا يحب السجائر، وقال: "الشيشة والسجاير بيأثروا على الصوت، ومش بحب السجاير، وفيه حاجات كتير بتأثر على الصحة، وبشرب شيشة وعارف إنها مضرة، بس بحبها، ودلوقتى أنا قاعد فى البيت والوضع مأساوى".
وانتقد محمود العسيلى، خلال لقائه ببرنامج "شيخ الحارة والجريئة" مع المخرجة إيناس الدغيدى، برامج المواهب واكتشاف الأصوات الجديدة، موضحا أن هذه البرامج تظهر بها أصوات ممتازة، ولكن تنتهى بعد فترة بسيطة ولا يتبناها أحد، معبرا عن تعاطفه مع هذه الأصوات.
كما رفض العسيلى أى محاولة لمنع أو وقف مطربى المهرجانات، قائلا: "أنا ضد منع أو وقف أو حجر مطربى المهرجانات، هم خلقوا لون لمصر، والكلمات اللى بيقولوها جاية من المجتمع، وأنا ضد الحجر على أى حد عشان الحاجة اللى بيقدمها، وما دام الناس بتحبهم وبتسمعهم يبقوا ناجحين".
وأضاف العسيلى: "بتوع المهرجانات حققوا أضعاف اللى إحنا بنحققه وهما بيمثلوا حاجة مهمة ومينفعش نتجاهلها و90% من الشعب المصرى بيسمعهم، وأرقامهم أضعاف أضعافنا".
وتابع: "مطربو المهرجانات بقوا موضة ومعظمهم بيبقى تقليعة، ولكن فيه ناس بتعمل حاجات كويسة زى أوكا وأورتيجا والمدفعجية وحسن شاكوش"، مؤكدا أن الكثير منهم موهوبون وجمال وبيمثلوا جزءا مهما من ثقافة بلدنا اللى موجودة الآن، وأوضح أن البعض منهم قوى للغاية وسيستمر والباقى موضة وستختفى.. والجامد هيفضل مكانه".
وعن تجربته فى التمثيل قال العسيلى: "أنا عارف أنا مركز فى إيه ومش عايز ابقى مشتت، وجربت خليج نعمة، وأنا نجحت فى التمثيل وقتها وبيعتبر من الكلاسيك".
واعترف محمود العسيلى، بأنه لا يمتلك الرفاهية التى تؤهله لتعلم التمثيل، وقرر أن يركز فى الجانب القوى فيه، وهو الغناء، مع تأكيد دور التمثيل فى حياة الفنان بشكل عام، مستشهدا على كلامه بتجربة النجم تامر حسنى.
وقال: "من أقوى عوامل نجاح تامر حسنى أنه شاطر فى التمثيل، وده فارق معاه جدا ومتفوق بيه علينا كلنا، وهو فى حته ومنطقة مختلفة عننا تماما كمغنين".