كشف الفنان محمد عز، الجوانب الخفية الطيبة لمدير أعماله مينا نور، الذى توفى اليوم بعد إجرائه عملية جراحية، قائلا: أول ما اشتغل معايا قولتله أنا أجرى ضعيف مش معايا فلوس أديهالك، قالى أنا بحبك وعاوز اشتغل معاك، وأنا معاك على الحلوة والمرة.
وأضاف: كان قد كلمته فعلا، فى الحلوة والمره فى ضهرى وفى كتفى لو نجحت يطير من الفرحة ولو وقعت أو الأيام ضيقتها علينا كان أول واحد يقومنى على حيل، قسمنا الرغيف والسيجاره والفلوس، وأما كانت تزنق معايا كان يروح يستلف ويدينى ويقولى لازم يبقى شكلك كويس قدام الناس، كان بيتقطع لو حد كل حقى وكان ممكن يعمل المستحيل عشان حقى يرجعلى.
وتابع: أقسم بالله كان يطلع اللقمة من بقه ويديهالى، وكان مآمن فيا ومصدق إنى هنجح، وكان دايما يقولى أنا هبقى مدير أعمال أهم ممثل فى مصر، وكنت بضحك واقوله مش قوى يا عم كان يقولى هتشوف، مكنتش بفكر فى حاجة ولا يشغلنى شىء طول ما هو موجود جنبى.
واختتم حديثه: ألف رحمه ونور عليك يا حبيبى وأخويا وصاحبى، ومتقلقش اللى حلمنا بيه هعمله عشان خاطرك أنت بس والله، أنت أكتر إنسان حبيته يا مينا، أرجوكم ادعوله، كان جدع وراجل مع كل الناس.
وكان الفنان محمد عز قد أعلن عن وفاة مدير أعماله مينا نور الدين، خلال إجرائه عملية جراحية، حيث كتب عبر حسابه بموقع "إنستجرام": "إنا لله وإنا إليه راجعون، توفى إلى رحمة الله صاحبى وأخويا ومدير أعمالى مينا نور أثناء إجراء عملية جراحية، أصعب فراق يا حبيبى ربنا يرحمك ويصبرنا.. أصعب لحظات حياتى.. لا إله إلا الله".
