حسنى شتا: الحمد لله قدرت أتخلص من أسوأ حاجة فى حياتى

نشر الفنان الشاب حسنى شتا على صفحته بموقع التواصل الاجتماعى فيس بوك، بوست يوضح فيه تجربته بالإقلاع عن التدخين، وقال: "الحمدلله قدرت أتخلص من اسوأ حاجه فى حياتي..كنت الاول بعد الأيام وأشوف بقالى اد ايه مبطل سجاير..لكن الحمدلله دلوقتى نسيتها اصلا ومش بفكر فيها ولما بشوف صورى وانا بشرب سجاير بفتكر..اد ايه الواحد كان غبى انه بيدمر صحته بايدية..ربنا يكرم اى حد بيشربها انه يبطلها ويتخلص منها والموضوع سهل جدا شويه اراده واصرار ولو بتحب حد بجد أوعى تمل انك تنصحه انه يبطلها وخلى بالك اللى يعزم عليك بحاجه تضرك اكيد مابيحبكش.. واه طول عمرى بلعب رياضه بس من غير السجاير افضل مليون مره الصحه نعمه من عند ربنا حافظوا عليها ديه اهم حاجه فى الدنيا 

تعديل: علشان فيه ناس فى الكومنتات بتقول بلاش تقول انها اراده واحكيلنا الخطوات...

صدقنى والله الموضوع كله اراده..انا فضلت سنين طويله بشربها بشراهة..ووصلت لمرحله إنى بشربها اكتر ما بتنفس وحسيت فعلا ان حياتى جحيم وبقيت عصبى جداا ودايما متوتر وقلقان واكيد نفسى مكانش احسن حاجه وكنت بفكر كتير إنى أبطلها وكل شويه اخد قرار ومفيش اى خطوه..ل حد ما اكتشفت ان اه السجاير مأثرتش عليا فى الفتره ديه بمرض عضوى الحمدلله..بس الأخطر انها اثرت عليًا وانا أصبحت مريض بضعف الإيمان وانى لو فضلت اشرب حاجه انا متأكد انها بتقضى على صحتى بالتدريج وقيس على ده بقى انك بتأذى كل اللى حواليك من اهلك وصحابك وناسك بالتدخين السلبى وهما ملهوش اى ذنب غير انهم موجودين فى نفس المكان اللى حضرتك بتشرب فيه سجارة اللى حولتك ل عبد ليها..!!! ومفيهاش اى فايده او متعه فيها!!! يبقى كده انا ضعيف الشخصيه..ومن ناحيه تانيه فكرت انها فعلا حرام...انا بشتغل علشان اجيب بفلوس ربنا كرمنى بيها.. حاجه تضر الأمانة اللى ربنا وضعها فيا..ليه بأذى روحى ليه!!! 

حتى لو كان عندك القدرة المادية انك تشترى مليون علبه..ياأخى اعمل بالفلوس ديه اى خير هتقولى بعمل!! هقولك بس بتعمل..شر.. ايوه السجاير شر..ونمت وقمت فى يوم بعد تفكير كتير مبطل سجاير من غير بقى اصلى هقلل وواحده واحده..لا بطلت مره واحده والحمدلله داخل فى سنه من غير هم ولاقرف السجاير..السجاير مش رجوله ولاشياكه للبنات.السجاير مرض وضعف فى الشخصيه واللى عاوز يعمل حاجه يعملها كل واحد حر وكل حاجه فى الدنيا اراده وربنا يوفق الجميع فى الخير ويسعد قلوبكم واه بقول نصيحه للناس اللى بتحبنى ونقوى بعض على الصح..النصيحه مش حاجه ممله ولاغلط ولامزعجه زى ما الموازين اتقلبت فى الزمن ده..النصيحه خير وواجب".

يذكر أن آخر ظهور للفنان حسنى شتا هو مشاركته فى مسلسل "شديد الخطورة" وعبر من قبل عن سعادته بالمشاركة فى مسلسل شديد الخطورة، الذى يعرض على منصة watch it، حيث قال: سعيد جدا تلك التجربة حيث أننى جسدت دورا مختلفا تماما عن الأدوار التى قدمتها من قبل، كما أننى سعيد بمشاركتى مع مخرج متميز مثل المخرج حسام على وأسعى للعمل مع مخرجين متميزين، ويعتبر مسلسل "شديد الخطورة" أول بطولة مطلقة للفنان أحمد العوضى الذى يعد من الفنانين المتميزين بجانب أنه صديق مقرب لى.