حرص صناع فيلم "تؤام روحى" بصحبة المنتج أحمد السبكى، ونجليه المخرج كريم السبكى والمنتج محمد أحمد السبكى، على مشاهدة الفيلم مع الجمهور داخل إحدى السينمات بمدينة الإسكندرية.
وحضر من أبطال العمل النجم حسن الرداد وأمينة خليل وعائشة بن أحمد ومخرج العمل عثمان أبو لبن، وحضرت أيضا أمنية مختار، ابنة الفنانة الراحلة رجاء الجداوى، وفى لفتة جميلة قام المنتج أحمد السبكى بتقديمها للجمهور، وإهداء العمل إلى روح والدتها.
وكان الفنان حسن الرداد قد صرح فى لقائه مع الإعلامية منى الشاذلى قائلا: أنا بحب السينما، والفن جدا وأكتر حاجة بعملها، وأنا ملتزم فيها وفى مواعيد التصوير، وفيلم "تؤام روحى" كان مليان حاجات لازم أتعلمها قبل التصوير، مثل قيادة الموتوسيكلات والغطس.
وأوضح: كانت عندى عقدة من الموتوسيكلات من صغرى، ولما اتقالى إنى لازم أركب موتوسيكل فى الفيلم كنت فرحان ولكن قلقان، وبالفعل عثمان أبو لبن جابلى حد يدربنى على ركوب الموتوسيكل، واتعلمت بسرعة الحمد لله، ولكن المشكلة إن لما حد يكون راكب وراك بتكون حاجة تانية، ودى كانت شجاعة من أمينة خليل إنها تركب ورايا.
وتابع: أما بالنسبة للغطس، كانت مشكلته فى التوقيت؛ لأنه كان فى آخر يوم فى شهر يناير فى عز الشتاء والميه كانت تلج، وكلهم كانوا لابسين بدل غطس حرارية، وأنا كنت لابس حاجة نص كم كده، ومثلت المشهد تحت الميه والتصوير أخد مننا يوم واحد بس.
فيلم "توأم روحى" يحمل فكرة مختلفة على السينما المصرية، ويشارك فى بطولته كل من: الفنان حسن الرداد وأمينة خليل وعائشة بن أحمد، الفيلم يدور فى إطار رومانسى، وهو من كتابة أمانى التونسى وإخراج عثمان أبو لبن.
