وجهت الإعلامية رضوى الشربينى، نصائح لكل فتاة تجاوزت سن الثلاثين من عمرها خلال برنامجها "هى وبس"، الذى يعرض على شاشة "CBC سفره"، قائلة: "أول حاجة فى ستين داهية اللى يزعلك، ولازم تقولى كده، وأنت مقتنعة بيها، تقوليها وأنت واخدة نفس عميق، أيا كانت الأسباب، كل حاجة بتاخد وقتها وطالما راضية ضميرك وعاملة اللى عليكى افتكرى عن عمرك وطاقتك أمانة معاكي، وإهدارهم على من لا يستحق أمر لا يستهان به، فى نهاية كل مطب، كل واحد بيرى بعين طبعه".
وأضافت: "طالما عديتى الثلاثين معدل الحرق عندك اتغير، اتحركى روحى جيم، واتمشي، أعملى أى حاجة هتفرق معاكى نفسيا، اقرى رواية أو اتفرجى على فيلم، تطلعى منه معانى حلوة، الصاحب ساحب، بلاش تصاحبى الناس النمامة والشكاية اللى تحرق الدم، صاحبى وشوش جديدة تحب الحياة تقول الحمد لله دون تهويل".
وتابعت "ابعدى عن كل اللى دورهم فى الحياة الانتقاد والنصيحة، بنية أننا عارفين مصلحتك أكتر منك، قربى من ربنا بأى صورة وثبتيها مهما حصل، تأملى النعم اللى ربنا أنعم عليكى بيها عشان مش تحسى بالمفقود، وتحسى فقط باللى موجود، والجى لربنا فى كل مشاكلك وبلاش تحكى مع الناس عشان الناس تبقى عندها فضول لتكشف اسرار لتعاير بعد كده، اللى يحل لك مشكلتك هو ربك وافتكرى أسماء الله الحسنى".