جمال يوسف بعد إصابته بالسرطان: الموت ميخوفش اللى يخوف الوقوف قدام ربنا

كشف الفنان جمال يوسف لـ"عين" آخر تطورات حالته الصحية بعد إصابته بمرض "سرطان البلعوم" وتفاصيل بدايته مع المرض بعد اكتشافه فى شهر مايو الماضى، موجهاً فى البداية الشكر لكل الناس التى دعت له قائلاً: "ربنا يجعله فى ميزان حسانتهم يا رب" وذلك من خلال تسجيل صوتى خاص.

وأشار جمال يوسف إلى أنه اكتشف المرض فى شهر أبريل الماضى وقال: "بدأت أشعر بآلام فى الغدة الليمفاوية والدكتور قال لى أعمل عينة وذلك فى شهر 4، وخرجت نتجية العينة فى شهر 5 واكتفت اصابتى بورم فى الغدد اللمفاوية البلعوم الأنفى".

وأضاف يوسف: "اتجهت للنقابة، وربنا يجازيه خير ويباركله الدكتور أشرف زكى، دا مش بنى دا ملاك وقف جنبى وبعتلى دكتور أورام قالى لازم ناخد جلسات كيماوى ونعمل 35 جلسة اشعاع، وبعد ما اخدتهم أثروا على البلع والأحبال الصوتيه علشان كدا صوتى مش واضح أوى".

واستكمل حديثه موجها فيه الشكر لكل الفنانين الذين وقفوا بجانبه وقال:"انا متشكر لكل الناس اللى دعت لى ربنا يجازيهم خير، وبشكر أستاذى الفنان الكبير محمد صبحى هو مش استاذى بس هو أبويا، بشكر أيضاً الفنانة نشوى مصطفى والفنانة وفاء عامر والفنانة حنان سليمان لأنهم وقفوا جنبى وكتر خيرهم عرفونى معنى الزمالة".

وتابع: "بشكر أخويا وصديقى الفنان إيهاب فهمى والفنانة نهال عنبر والفنانة عفاف رشاد، ومتشكر لكل الناس اللى دعت لى، وأنا ليا طلب من المتابعين والجمهور والأصدقاء أدعولى ربنا ربنا ياخد بايدى ولو مليش نصيب أكون موجود وأرح لربنا ربنا كبير، أنا مش خايف من الموت أنا سايب أمرى لله لأن الموت ميخوفش اللى يخوف وقفة البنى آدم قدام ربنا خايف أكون واقف قدام ربنا وعليا أخطاء، أنا بستغفر ربنا كل شوية، والحمد لله على كل حال".