قال الفنان أمير كرارة، جمعنى بالفنان عمرو يوسف موقف كوميدى جدا، أثناء تصويرنا مسلسل "طرف تالت"، وكان عندنا تصوير فى سلوفينيا، وكانت أول مرة ليا أروح هناك.
وتابع كرارة، خلال برنامج "سهرانين" الذى يقدمه على قناة ON، أثناء استضافته الفنان عمرو يوسف والمطربة بوسى، المهم سألت قبل كده هنسافر فين عشان مش عارف، فقالولى بص هى قريبة أوى من إيطاليا، وأنا كان ليا واحد صحبى اسمه أحمد عايش فى إيطاليا، فكلمته وقلتله أنا فى إيطاليا فقالى بجد طيب أنا قريب منك فى حدود نص ساعة بس، وبعد كده فكرت أنزل أشترى حاجات وملقتش الموضة اللى بيقولوا عليها فى إيطاليا، ولما سألت عمرو يوسف ضحك وصدمنى بأن دى سلوفينيا مش إيطاليا.
وكان الفنان عمرو يوسف قد قال: تجمعنى ذكريات جميلة مع المطربة بوسى، وكمان كندة بتعشقها جدا، وكانت موجودة فى فرحنا وولعت الدنيا، وكندة بتحب الأغانى الشعبية، وأنت لما تشوف تفاعل كندة على الأغانى الشعبى هتلاقيها من شبرا مش من سوريا.
فيما روت المطربة بوسى، خلال استضافتها ببرنامج "سهرانين" للنجم أمير كرارة المذاع على قناة ON، بنفس الحلقة، موقفا تعرضت له أثناء إحيائها للأفراح، وهو أن العروسة تكون غيرانة منى، وأكنى هاخد جوزها وأنا ماشية، وفى مرة كان فى عريس مركز معايا أوى وبيرقص معايا وسايب العروسة، راحت جيباه شداه من اللياقة، وأنا فضلت ميتة من الضحك.
