40 يوما مرت على وفاة الفنان القدير سناء شافع، الذى توفى يوم الأربعاء 12 أغسطس الماضى، حيث نشرت عائلته وتحديدا أولاد زوجته السيدة ماجدة حافظ، مقطع فيديو له، تضمن أعماله وكواليس حياته الشخصية مع العائلة، مصاحبا لأغنية شيرين عبد الوهاب "علشان أجيال بعدنا جايين".
وكتبت العائلة تعليقا على الفيديو قائلين: أربعين يوم والراجل ده مش فى بيتنا.. لا انتو مش فاهمين يعنى إيه.. يعنى مفيش روح فى البيت يعنى كل خشباية فى البيت زعلانة والزرع بتاعه مات من كتر الزعل مع إننا بنسقيه.. هو أنا آه مش من لحمه ودمه بس أنا حياتى واقفة، حاسس إن حتة من جسمى اتقطعت.. عضمى اتكسر.. اللى شالنى وانا صغير سابنى وانا برضوا صغير.. ومش عارف هبكر إزاى من غيره.. لما كنت بتحط فى مشكلة كبيرة كان فى حتة جوايا بطمنى الحتة دى هو.. كان بيعاملنى زى ابنه بالظبط لما كنت بغلط كان بيعاقبنى ولما حد كان ييجى عليا كان بيجبلى حقى منه ويخلينى رافع دماغى لفوق.. عمره ما حرمنى من حاجة.. كان صاحبى.. كان أعز صاحب ليا.. كان بيحكيلى مشاكله ويخلينى احلهاله وأنا لسه منضجتش.. لما كان يلاقينى موهوب فى حاجة كان بينميهالى.. كان علطول بيفتخر إنه عنده عمر وعلى مع إن المفروض إحنا اللى نفتخر إن عندنا أب وصاحب زيه كان دايما يقول "على وعمر عكازى فى الدنيا " مع إنه كان سند لينا لآخر يوم فى عمره.. كان بيحب إخواتى البنات وكان بيعتبرهم زى مايا بنته بالظبط، وكان بيخاف عليهم أوى.. وحشتنى يا "ديجى ديجى" ووحشنى هزارك معايا وكلمتك اللى كنت علطول بتقولهالى "أنت قرّة عينى".. ربنا يرحمه ويغفر له ويدخله چنة الفردوس، ويسكنه منازل الصديقين والشهداء والصالحين.. أنا آسف دفنتك وسبتك أكيد هجيلك فى يوم مع السلامة يا قرّة عينى".
يذكر أن الفنان سناء شافع شارك فى رمضان الماضى بمسلسل "ليالينا 80" تأليف أحمد عبد الفتاح وإخراج أحمد صالح، وبطولة كل من: إياد نصار، صابرين، غادة عادل، وخالد الصاوى ومحمد الشقنقيرى وميدو عادل ونهى عابدين ومحمد على رزق، كما ظهر كضيف شرف فى مسلسل "القمر آخر الدنيا" مع بشرا وهشام إسماعيل ومؤمن نور وسميرة عبد العزيز وإخراج تامر حمزة.