قال النجم أحمد السقا: التمثيل شغلانة كلها توتر، وتجسيد الشخصية عبارة عن مجموعة تفاصيل، فمثلا لو افترضنا فيلم إبراهيم الأبيض لازم تكون له طريقة فى المشى والكلام، وطريقة محددة فى كل حركة لازم أعملها حتى لو من خلال انقلاب سيارة.
وأضاف أحمد السقا، خلال لقائه فى برنامج "معكم" تقديم الإعلامية منى الشاذلى المذاع على قناة Cbc: الموضوع مش حكاية قلب ميت وخلاص، ولكن بتكون فيه حسابات محددة وقياسات واتجاه الهواء فين، وكل حاجة بتكون محسوبة قبل ما أعمل قفزة خطيرة أو انقلاب سيارة أو غيرها، بس بتكون فيه حاجات بيد الله وحده.
وعن أيام الدراسة بالمعهد قال: مجدى كامل كان بيصرف علينا، وكنا بناخد الأكل بصورة غير شرعية من سوبر ماركت والد مجدى، لأننا كنا عاملين مفتاح على المحل وناخد اللى عاوزينه، وأنا تجمعنى صداقة كبيرة بمجدى لأننا كنا عايشين مع بعض فى أوضة صغيرة تحت الأرض فى المنيل، وأحمد حلمى كان عامل الديكور بتاعها.
وتابع: مكنش لسه فيه مصدر دخل لينا، وأنا كنت باخد 14 جنيه منحة من المعهد عشان بطلع الأول، فكنا بنمشى بيهم الدنيا، وفى مرة كنا واخدين شكاير رز كتير من التموين بتاع والد مجدى كامل، ولما قفشهم عندنا فى الأوضة وإننا عاملينها سرير جرى ورانا وشتمنا وبهدلنا، وكمان كنا بنستعير اللبس اللى بنلبسه من محل أشرف أخو مجدى كامل ونرجعه تانى بعد ما مجدى يكويه وينضفه.
يذكر أن النجم أحمد السقا انتهى مؤخرا من تصوير فيلم "العنكبوت" تأليف محمد ناير وإخراج أحمد نادر جلال ويشارك فى البطولة كل من: منى زكى، ظافر العابدين، يسرا اللوزى، شيماء سيف، زكى فطين عبد الوهاب، ومحمد ممدوح ضيف شرف، وتدور أحداثه فى إطار أكشن، ولم يتم تحديد موعد نهائى لطرحه فى دور العرض السينمائى.
كما يظهر النجم أحمد السقا بصحبة النجم أمير كرارة، من خلال مسلسله الصعيدى "نسل الأغراب"، لأول مرة فى الدراما، بعد تعاونهما سويا فى فيلمى "هروب اضطرارى" الذى عاد به كرارة إلى السينما بعد غياب سنوات، وكذلك "حرب كرموز" الذى ظهر فيه السقا كضيف شرف خلال المشهد الأخير من الفيلم.
