عبرت النجمة منى زكى عن استيائها من ظاهرة العنف الأسرى قائلة: بالنسبة لى غير مقبول تماما، وللأسف فيه حاجات موجودة فى تقاليدنا، وغير مقبول إن أى حد يمد إيده على أى حد حتى لو كانت زوجته أو أخته.
وأضافت خلال مداخلة هاتفية فى برنامج "كلمة أخيرة" مع الإعلامية لميس الحديدى المذاع على قناة ON، أنا سفيرة لليونيسيف، وكنت عاملة حملة "بالهداوة مش بالقساوة"، وإن لازم الموضوع يكون فيه تواصل بين الأجيال بشكل أفضل، ونبتدى نغير التقاليد اللى اتعودنا عليها وهى مش صح.
وتابعت: مش صح إن حد يمد إيده على حد، ومشاعره وكبرياؤه يتكسروا مهما كان سنه حتى لو كان طفل صغير؛ لأن كل دى حاجات بتفضل جوا الإنسان، وأنا حتى بتعامل مع بنتى "لى لى" بالنقاش ثم النقاش، ولازم يكون فيه النفس الطويل، وتكون فيه ردود مقنعة، سواء منى أو منها، ولو على العقاب ممكن يكون من خلال حاجة بسيطة زى منع الموبايل عنها لمدة محددة، وأنا محدش ضربنى واتربيت على كده، وأحب أربى ولادى على كده برضه.
وكانت الشركة المتحدة للخدمات الإعلامية، قد أعلنت عن تعاقد قناة ON العامة، برئاسة ألبرت شفيق، مع الإعلامية لميس الحديدى، لتعود ببرنامج جديد باسم "كلمة أخيرة مع لميس الحديدى"، وذلك بعد غياب عامين عن الشاشات المصرية، ويذاع من السبت إلى الثلاثاء، فى تمام الساعة التاسعة مساءً.