صورة.. اعرف سر «اكتئاب» نجل مجدى كامل ومها أحمد

فاجأ عادل نجل الفنان مجدى كامل والفنانة مها أحمد متابعيه على موقع انستجرام، حينما أعلن أنه يعيش مؤخراً أوحش أيام حياته على حد وصفه، مستعرضاً أسباب هذا الشعور حينما أكد أنه مريض دون التوصل لعلاج أو معرفة سبب مرضه فى الأيام الأخيرة، بالإضافة لشعوره بالحزن بعد أمور كثيرة تعرض لها مؤخراً.

حيث كتب : "انا بكتب الكلام ده وانا ايدى بتترعش وفعلا تعبان ومش قادر ومش عارف انا عندى ايه ومش عارف اتكلم مع حد علشان مش عايز اخلى حد يشيل همى، بس انا هكتب الكلام اللى عايز اكتبه ده علشان انا مش عارف اللى جاى ايه ولا هيحصل ايه، انا حياتى بايظه بقالها اربع شهور من يوم ١٥-٦ لحد انهارده ١٥-١٠".

ثم أضاف : "الأربع شهور دور أوحش أربع شهور عدوا عليا فى حياتى من يوم ما جيت الدنيا علشان حصلى فيهم حاجات وجعتنى وتعبتنى وأثرت على نفسيتى، أولهم كان اول حب فى حياتى عاش لمدة سنه ونص وكان نهايته يوم ١٥-٦، بعدها كان وفاة حفناوى صاحبى واخويا يمكن مكناش قريبين من بعض بس مجرد مبنتكلم مع بعض او بنشوف بعض بيبقى اكننا نعرف بعض من الحضانه وكان فى ذكريات حلوه اووى لينا مع بعض، بعدها البيت بتاعنا لما غرق كله ولحد دلوقتى منعرفش غرق ازاى ولا ايه اللى حصل بس الحمد الله على كل شئ ولحد دلوقتى البيت لسه بايظ ".

ثم استكمل حديثه حول مرضه بقوله : "و اخرهم بقى وده لسه من ٣ ايام انى تعبت جدا فجأه وتعبت تعب مش عادى ومش عارف انا عندى ايه ولا الدكاتره عارفين انا عندى ايه، خت جميع الادويه وخت حقن وبنام كويس وباكل كويس وبعمل كل حاجه وبرضه مفيش اى تحسن، انا بكتب الكلام ده دلوقتى وانا مش حابب كده خالص ولا كنت عايز اعمل كده بس عملت كده وكتبت كده وهنزله علشان انا بجد خايف من اللى جاى ومش عارف ايه اللى ممكن يحصل، فعلشان لو حصل حاجه اكون كتبت كل اللى جوايه واكون ارتحت انى عملت كده وعلشان برضه تكونوا عارفين ان الضحك والهزار والخروج والاستوريز مش دى الحياه الحقيقيه، الحياه الحقيقيه هى اللى انا حكاتها دلوقتى، محدش يعرف انت حياتك عامله ازاى ولا ايه اللى بيحصل فيها ولا جواك ايه كله شايفك فى صور وفيديوهات مش حقيقيه، المهم ربنا يستر فى اللى جاى ويعدى على خير ان شاء الله علشان المره دى انا بجد حسات بالموت، فلو عدت على خير حيات الواحد هتتغير تماماً فى كل حاجه حته فى الصور والفيديوهات، اسف انى طولت عليكوا، يارب انت الشافى المعافى".