قالت الفنانة الكبيرة يسرا، إن أهم ما شجعها على أن تكون ضمن مؤسسى مهرجان الجونة السينمائى كونها قطعة من مصر لا يعرفها الكثيرون، فالجونة قطعة من أوروبا.
وأضافت خلال لقائها مع الإعلامية لميس الحديدى، فى سهرة خاصة بمناسبة افتتاح مهرجان الجونة السينمائى فى نسخته الرابعة والمذاع على شاشة "ON"، قائلة: "حتى الصعايدة اللى شغالين هنا قمة الجدعنة أنا فاكرة أن مرة ضاع حلق ففضلوا يدوروا عليه لحد ما لقوه، وأنا شكرتهم واحد واحد، فضلوا مش ناسيين ده لحد دلوقتى، فيهم جدعنة وأصالة".
وتابعت: "أنا ضمن المؤسسين من الدورة الأولى للمهرجان وعمرى ما تخيلت يبقى كده ربنا ساعدنا بجد بحاجات كتيرة والمحبة كانت سائدة منذ الدورة الأولى وأمانة بيننا جميعا كل اللى فيه كانوا بيفكروا بس إزاى ينجحوه؟ ما حدش كان منفرد برأيه وده من أساسيات النجاح للمهرجان".
وتعليقا على الجائزة التى حصل عليها أنسى أبو سيف قالت يسرا: "أنسى أبو سيف أنا عملت معاه مش أقل من 30 أو 40 فيلما، وبعدين جمال شخصيته متمركزة فى أنه عمره ما بيحب يقول أنا عملت وسويت، ومش هنسى دوره فى فيلم اسكندرية كمان وكمان.. أنسى شخص خاص جدا وجدع جدا، مرات نكلمه عشان ناخد نصيحة فى تصوير فيلم هو مش موجود فيه يدينا النصيحة بإخلاص بدون حسابات.. أنسى أبو سيف اسطورة من أساطير السينما المصرية".
وتابعت قائلة: "السينما مش ممثل بس السينما فريق عمل متكامل يبدأ من المخرج ويمر بالممثل وكل من خلف الكاميرا وكل الطاقم الفنى، حتى العامل اللى ورا الكاميرا بيسأله عن رأيه فى الأداء، ونقوله إيه رايك عملت المشهد كويس؟".
وحول ذكرياتها مع الفنان الراحل محمود ياسين قالت: "اشتغلت معاه كتير وكان أول مرة أروح كواليس فيلم من قبل بدايتى كان فيلم " الكداب" اتفرجت ساعتها على الأستاذ محمود ياسين من بعيد عشان أشوف بيمثله إزاى، وأنا فاكرة أن كان عندى مشهد معاه فى فيلم "الثأر" بعد خروجى من المستشفى، وعندما تحدث مكنتش عارفة امسك بربشة عينيا من جمال صوته.. كفاية أخلاقه وأدبه.. عنده مبادئ وكان خجول جدا، ولما كان يشوفنى وأنا زعلانة ومضايقة كان بيضحك وأسأله بتضحك على إيه؟ يقلى إنتى متزرزرة خالص".
وحول رحيل القامات قالت: "مصر كانت شجرة عظيمة مليانة قناديل منورة كل شوية قنديل منهم ينطفى ويروح مننا واللى بيروح مش بيرجع النهارده، فى المهرجان كرمنا كام فنان رحلوا فى سنة واحدة، وهؤلاء هم صناع السينما المصرية الحقيقية شويكار ونادية لطفى وكلهم هنرجعهم إزاى؟".
وحول تعاملها مع الجيل الجديد بالأخص الفتيات قالت يسرا: "أنا كنت صبورة جدا فى بداية حياتى هما كمان لازم يصبروا ويعلموا نفسهم مش بالقراءة بالإحساس ويطوروا نفسهم ومايقفوش عند حد معين وإزاى يكملوا المشوار بجد".
وحول أعمالها المستقبلية قالت: "بعد خيانة عهد هعمل غير المتوقع، وغير المتوقع لازم ننتظره؛ لأن المتوقع مش هيمشى دلوقتى إحنا لازم نتخض كل شوية.
