قالت الفنانة نسمة عبد العزيز، عازفة الماريمبا، أنا بحب الموسيقار عمر خيرت جدا، ومش أنا بس ده كل الناس، واللى يعاشره زى ما عرفته يحبه أضعاف مضاعفة أكتر من المزيكا بتاعته.
وأضافت خلال لقائها فى برنامج "معكم" للإعلامية منى الشاذلى، المذاع على قناة cbc، علاقتى بدأت مع الموسيقار عمر خيرت لما كنت طالبة وكنت بشتغل فى أوركسترا الأوبرا، ولما شفته الجراءة خدتنى وروحت قلتله أنا بحب المزيكا بتاعتك وقلتله عاوزه ألعب حاجة على الماريمبا فقال لى اختارى، واخترت وقتها البخيل وأنا، وافتكرت إنه هينسى، لكن لقيته جايبها ليا متوزعة وكتبلى إهداء لـ"نسومة"، ومن ساعتها عملى "عم صابر" و"مسألة مبدأ، وجزء من "العرافة".
وأشارت إلى أنها فى المنزل لم تكن لها شعبية قوية؛ بسبب الإزعاج التى تسببه لهم، مما اضطرت أن تضع كتامات صوف أسفل الخشب حتى تقلل الصوت، مؤكدة أنه عند زواجها طلبوا منها أن تأخذ الماريمبا معها.
وتابعت: الماريمبا كانت حلمى، وحوشت جزء من تمنها وماما كملت ليا الجزء الباقى وجبتها بالقسط وفجأة، وفى مرة كان عندى حفلة، وبعد ما خلصتها وهى منقولة على السيارة النقل حد طلع فوق وسرق منها جزء، وأنا بقى كنت قلبتها مناحة، وعملنا محضر وبعد 3 شهور رجعتلى، بس كنت جيبت واحدة تانية، وعرفت إن واحد اشتراها من اللى سارق، وكان هيعملها "ستارة حمام"، ومش فاهمة إزاى.
واستكملت، عشان أعزف حاجة لازم تلمسنى، وفيه حاجات مبتنفعش حتى لو حسيتها إنها تطلع، زى أغنية "لسه فاكر" للسيدة أم كلثوم، هى مطلعتش من آلة الماريمبا خالص، لأن لما حاولت عزفها محسيتش إنى قدرت أوصلها صح.
