قال الفنان محمد فراج، فيلم "الممر" من أحلى التجارب اللى عملتها فى حياتى عشان عوامل كتير جدا أولها إن الفيلم من إخراج شريف عرفة، وكل عوامل الفيلم من ديكور ومزيكا وإضاءة وكل حاجة، ثانيا بنقدم موضوع عن أبطال حقيقيين من قواتنا المسلحة فى نكسة 67، فدى حاجة أى ممثل سواء كبر حجمه أو صغر يتشرف بأنه يكون جزءا منها.
وأضاف خلال لقائه فى برنامج "It's Show Time"، تقديم الإعلامية دينا حويدق المذاع على قناة cbc، دور العسكرى هلال كان من ضمن الأسباب؛ لأن أولا شخصية صعيدية، وعنده قصة حب وعنده قصة انتماء لبلده ومش عاوز ينزل إجازة من ساعة ما نزل الحرب عشان قلبه على البلد، وبعتبر انها تجربة ربنا كلل جهدى بيها.
وتابع، غحنا عيطنا وإحنا بنفركش فى آخر يوم تصوير عيطنا؛ لأننا صورنا 42 يوما بالعدد فى 6 شهور، وقبلها بروفات شهرين، فالإجمالى 8 شهور عايشين كفريق عمل سوا، غير شهر بنتدرب فيه فى مدرسة القوات المسلحة كل يوم، وأنا مدخلتش جيش ولكن دخلته فى فترة الفيلم ده، وعلى قد ما التجربة متعبة أوى، وكنا بنقعد وقت كبير فى الصحراء، ومع ذلك كان على قلبنا زى العسل.
واستكمل: أنا كنت منفعل جدا فى الشخصية دى، وكنت متأثر بيها أوى عشان العوامل اللى قلت عليها ومؤمن بيها اوى وكان نفسى ييجى وقت أعمل حاجة كده، ومن احترافية العمل وجودة الناس اللى شغالة فيه؛ لأن الفيلم عندنا 5 لكنات مختلفة بخمس شخصيات مختلفة، وكل واحد له مراجع معاه عشان كل واحد يعرف إزاى اللكنة تتنطق، ولو جاتلى تجربة زى فيلم الممر تانى هاعملها وأنا مغمض عينى.
وعن أقرب الأعمال إلى قلبه قال: فيلم "ألف مبروك"؛ لأنه كان أول حاجة ليا فى السينما، وأنا أصلا بحب أحمد حلمى جدا وأول مرة لما روحت التصوير كانت ركبى بتخبط فى بعض، وكمان المشهد اللى عملته فى مسلسل الجماعة فى الجزء الأول، بعتبرهم فرقوا معايا فى شغلى جدا.