قال المطرب الشعبى محمود الليثى، أنا كنت عضو منتسب وفى عام 2014، قالولى إن فيه لجنة عضو عامل موجودة فى قاعة سيد درويش فى الهرم، وكل الناس قالتلى روح وأدخل الاختبارات، وإن شاء الله هتنجح لأنك بتعرف تغنى كويس.
وأضاف خلال فيديو خاص، روحت لقيت اللجنة مكونة من قمة من النجوم، منهم عمار الشريعى وإيمان البحر درويش كان هو النقيب وقتها، ومصطفى كامل وهشام عباس فى نقابة المهن الموسيقية، وبعد ما دخلت اللجنة لقيتهم بيقولولى انت جاى ليه فقلتلهم عشان أختبر عضو عامل.
وتابع، المهم الأستاذ عمار الشريعى قالهم خلوه يغنى يا جدعان ونسمعه، وقالى غنى يا بنى، وراح مصطفى كامل قالهم خلى الليثى يغنى "الأنبياء"، وبعد ما غنتها قلتلهم أغنى جزء من أغنية "مال الهوى ياما" للمطربة الراحلة صباح، وبعد ما سمعها عمار الشريعى راح قايل للفنان إيمان البحر درويش اطرده اطرده أنت نجحت يا بنى، ففرحت جدا وقلتله ربنا يخليك ومشيت.
وطرح المطرب الشعبى محمود الليثى مؤخرا، أغنيته الجديدة "قشطة بالزبادى" على موقع الفيديوهات الشهير "يوتيوب"، والتى استعان من خلالها بالراقصة البرازيلية لورديانا، واقتبس الليثى لحن أغنية "جدو على" التى قدمها المطرب محمد ثروت للأطفال، وحققت أغنية قشطة بالزبادى أكثر من 4 ملايين مشاهدة حتى الآن.
وقال المطرب الشعبى محمود الليثى، فى تصريحات خاصة لـ"عين": "أنا سعيد جدا بدعم الجمهور ليا فى أغنية "قشطة بالزبادى" مع الراقصة لورديانا ويا رب تفضلوا معايا وتنجحونا بعد ربنا سبحانه وتعالى؛ لأن إحنا من غيركوا مش هنعرف ننجح، وبشكر كل اخواتى اللى وقفوا جنبى فى الأغنية".
محمود الليثى طرح أكثر من أغنية الفترة الماضية، وهو مطرب شعبى شارك فى العديد من الأفلام السينمائية، كما قدم العديد من تترات المسلسلات الدرامية، ويعد محمود الليثى أول مطرب يدخل بين التواشيح والمدح والذكر والنزعة الصوفية على المولد واللون الشعبى.