قالت الفنانة حنان مطاوع، السوشيال ميديا صاروخ اقتحم حياتنا وبقى مؤثر وبقى مؤشر لحاجات كتير وبيوجه الإعلام نفسه، ولكن مش دايما بيعكس اللى بيدور فى الشارع، وممكن يكون بيعكس جزء منه، وهو عالم افتراضى خطير جدا؛ لأن أنت بتتكلم مع شخص مش شايفه ولا شايفك، فأنت مش عارف هو مين وهل هو شخص حقيقى ولا لأ، وفى النهاية أنا بحترم وجود السوشيال ميديا، ولكنها ليست المفضلة بالنسبة لى.
وعن توفيقها بين حياتها كزوجة وأم وكمرأة عاملة قالت، فى تصريحات خاصة لـ"عين": تقريبا مبقيتش أنام وجهازى العصبى يكاد هايكون هيولع، ولكن مقدرش أنكر خالص إنى لم أنجح من فراغ، ولولا جوزى مكنتش وصلت لأى حاجة، وأى إنجاز من بعد جوازنا هو له الفضل فيه بعد ربنا سبحانه وتعالى؛ لأنه بيدعمنى وشايلنى وبيتبنى أحلامى وبيجى على نفسه عشان اللحظات اللى بشتغل فيها، ووالدتى وأصدقائى بيساعدونى برضه.
وتابعت، أنا بعرف أطبخ لكن نص ونص، ولكن مش من هواياتى بالظبط لأن هوايتى التنظيف والتنظيم أكتر، ولكنى أقوم بطهى بعض المأكولات لزوجى.
وعن أمنياتها التى تتمناها قالت، ربنا يحفظنا كلنا من كورونا ويشيل البلاء العالمى عن البشرية ويحفظ مصر بلدى ويحفظ أهلى، ودايما مصر تبقى فى سلامة وتقدم، وعلى المستوى الشخصى ربنا يخليلى أمى وجوزى وبنتى وأهلى ودايما أقدر أقم حاجات جميلة ومختلفة.