قال النجم الكبير عبد الرحمن أبو زهرة: "أعشق التمثيل ومحبش أعمل الشخصية غير لما اتوحد فيها، وحصل موقف فى فيلم أرض الخوف مع أحمد زكى وداوود عبد السيد، كنت بصور مونولوج فى الجامع مع أحمد زكى، وبعد ما خلص المشهد وروحت كلمت داوود، وطلبت إعادة المشهد، قالى نكلم أحمد زكى نسأله كلمناه ووافق، وقال المعدات وكل حاجة ترجع تانى ويعمل المشهد تانى حتى يرضى عنه".
وأضاف عبد الرحمن أبو زهرة، خلال استضافته فى برنامج "صاحبة السعادة" للنجمة إسعاد يونس المذاع على قناة dmc، أحمد زكى شوفته كان على المسرح، شفت واحد متقمص خمس شخصيات، أبهرنى جدا، وكان لسه طالب قلت له أنت عبقرى يخربيتك، وهتبقى ممثل كبير جدا، وانبسط لما اتقابلنا فى أرض الخوف".
وعن دوره فى مسرحية الفرافير، قال: "كرم مطاوع مخرج عبقرى لكن كان رذل فى الإخراج ودورى فى المسرحية عُرض على حسن البارودى رفضه ولف لفة كبيرة، وكان دور ميت فى كفن ووافقت عليه".
