واحد من أبناء النجوم الذين قرروا أن يسيروا على خطى آبائهم، ممدوح ممدوح ابن الفنانة انتصار قرر أن يختلف عن الآخرين من خلال أحلامه وأفكاره المختلفة، ممدوح يضع هدفا معينا له خلال السنوات المقبلة وهو الفوز بجائزة الأوسكار، الحلم بعيد المنال.
فى البداية سألنا ممدوح عن كيفية دخوله لمجال التمثيل فقال: أنا حاليا فى الصف الثانى الإعدادى بالمدرسة الأوروبية الألمانية، وحلم التمثيل لم يكن يراودنى منذ الصغر، لكننى كنت أحرص فقط على حضور البروفات مع والدتى دائما، وآخر مكان تصوير تواجدت معها فيه كان تصوير مسلسل «راجل و6 ستات».
وأضاف: كنت باشوف دائما إن الممثلين حياتهم مدربكة يعنى مثلا ماما كانت تخرج من 6 الصبح علشان تروح التصوير، وترجع الساعة 4 الصبح فكانت اللخبطة دى سبب إنى مش حابب أمثل حتى ماما عرضت عليّ إنى أشارك معاها فى إعلان وكانت أختى معاها، بس أنا رفضت، لكن بعد فترة طويلة قلت لنفسى أنا ممكن أكون ممثل وفى نفس الوقت أنظم مواعيدى، ولما قدرت أحل المشكلة دى قررت أمثل.
وأكمل حديثه قائلا: بدأت الفن على اليوتيوب وعملت فيديوهات بلخص فيها يومى بالكامل، وكنت أول وأصغر واحد فى مصر يعمل الكلام ده، وفى مهرجان القاهرة السينمائى الأخير روحت مع ماما، وشافتنى المخرجة إيناس سيف مخرجة فيلم «6 فى الأرشيف» وقالت لماما أنا عايزة الولد ده فى الفيلم معايا، وماما معترضتش لأنها كانت عارفة إنى عايزة أمثل.
وهنا قاطعته انتصار وقالت: لم أفكر أبدا فى دخول ممدوح لمجال الفن لسبب بسيط وهو أن الوساطة فى الفن لا تصنع النجوم، ومن هنا قررت ألا أفرض ابنى على أى عمل، وأن يكون دخوله لهذا المجال من خلال اقتناع المخرجين به وبموهبته، وتفاجأت عندما طلب منى أن يخوض التمثيل لأننى أتذكر جيدا أنه كان يتضايق عندما أصطحبه معى وهو صغير، لكن عندما اتخذ القرار من نفسه علمت بأنه يريد ذلك.
ثم انتقلنا للحديث مع ممدوح مجددا وسألناه عن دوره فى الفيلم فقال: بلعب دور ولد اسمه «باقة» وهو الأخ الأكبر لـ«تيكا» الذى يلعب دوره الفنان أحمد فهمى وأنا المسئول عن صفحة السوشيال ميديا الخاصة به وبنزل عليها أفلام إباحية، باختصار أنا ولد صايع ينتمى لأسرة تحت خط الصفر وكل هذا فى إطار كوميدى.
وعن كواليس أول يوم تصوير قال: قبل الذهاب إلى التصوير نصحتنى والدتى نصيحة واحدة وهى أن أتعامل مع الكاميرا على أنها مجرد قطعة من الحديد، وفعلا كانت سببا فى حل أزمتى لأنى كنت متوتر جدا فى أول يوم تصوير، وفكرت نفسى بالنصيحة فعرفت أتعامل، وأول مشهد عدته خمس مرات وكمان كان من الناس اللى وقفت جنبى فى اليوم ده الفنان أحمد الشامى، لأنه لما شافنى متوتر قالى انسى كل اللى احنا فيه ده واتعامل عادى.
وتابع بقوله: من وقت ما قررت أمثل وأنا بذاكر لأنى بحب أكون فاهم الحاجة اللى بعملها، ومن أهم الناس اللى بتعلم منهم الفنان عادل إمام بتفرج على كل مسرحياته، عشان أتعلم منه كويس، وبتعلم من أفلام أجنبى زى فيلم 21 jump street.
وعن أهم الفنانين الذين يريد العمل معهم قال: نفسى أشتغل مع عادل إمام وعمرو واكد، وأحمد السقا، وأحمد الفيشاوى، وأحمد مالك، وطموحى الفترة اللى جاية إنى أكون مخرج وأفوز بالأوسكار.
أما عن فكرة احترافه الجمباز يقول: أنا بحب الجمباز جدا لأنه بيخلى شكل جسمى مختلف تماما عن كل اللى موجودين فى السينما، وكمان بيساعدنى إن يكون عندى قدرات جسدية مختلفة، ودايما بروح التدريب وماما بتحضر معايا وبتشجعنى على ده، وكمان بحب أقرأ الروايات بس بقرأها بشكل مختلف شوية، وهو إنى أخلى شخص يقرأها وبعد كده يحكيلى عنها.
