كشف المخرج مروان حامد انه استعان بطبيب نفسي من أجل فيلم الفيل الازرق، قائلا: عمري ما كنت أتخيل أشوف مكان زي 8 غرب لولا السينما بتخليك تروح اماكن لا تتخيل أن تروحلها قبل كده، واستعنا بطبيب نفسي عشان نعرف الطريقة بتكون عاملة إزاي".
وأضاف مروان حامد خلال جلسة نقاشية عقدت ضمن فعاليات مهرجان الجونة السينمائي 2023، عن شغفه في الإخراج قائلاً: أنا طول الوقت السينما والإخراج مسيطرين عليا وممكن أشوف حاجة تلهمني زي مثلاً مشهد سور مجرى العيون في إبراهيم الأبيض كان في الأصل ضمن معاينة في إعلان وفضل موجود في ذاكرتي واستخدمته في الفيلم.
وقال مروان حامد: لما بدخل حاجة جديدة لازم أذاكر لها من الأول وبرجع طول الوقت للدراسة الأكاديمية وأسترجع اللي درسته وأنا طالب، وكمان أنا متأثر كتير بالمخرج صلاح أبو سيف واستوقفني فيلم له اسمه البداية مليء بالخيال والحرية وشوف باقي أعماله إزاي قد يغير من نفسه وبحاول اكتسب هذا التنوع ويكون عندي نفس الشغف.
وأضاف مروان حامد: كنت شايل هم حاجة في الفيل الأزرق وهي إن إزاي الناس تتعاطف مع شخصية يحيي راشد وأنه عمل حادثة بسبب تناوله الكحول والحادثة دي كانت السبب في وفاة زوجته وابنته، فالممثل الكبير بيحل لك المشكلة دي وإحساس كريم عبد العزيز عالي وإحساسه بالندم خلق حالة تعاطف وتسامح مع شخصية يحيى راشد.
واستكمل مروان حامد: أنا بعمل كل التحضيرات والمعايشات عشان نخدم الممثل لأنه أهم عنصر وأننا نبعد عن النمطية وكل الممثلين اللي اشتغلت معهم رائعين وكلهم حطوا قلوبهم أمام الكاميرا وممثلين كبار ولهم جماهيرية كبيرة.
وتابع مروان حامد: "عاوز أشكر الفنانة الكبيرة يسرا لأن في عمارة يعقوبيان كان دورها 5 مشاهد ومع ذلك عملت كم تحضيرات وإعداد للشخصية وإتقان للهجة مذهل وأصبحت من أهم الشخصيات التي لا تنسي.