حلت الفنانة نيللي كريم ضيفة علي أحد البرامج الحوارية لتتصدر من خلاله الترند بسبب أرائها خلال الحلقة، فقد تحدثت عن رأيها في الرجالة هذه الفترة فقالت نيللي : "الرجالة اليومين دول محتاجين نحطلهم فيتامينات تقوي هرمون الرجولة عندهم وده ممكن نحطه في النيل"، في تعليق طريف أثار ضحك جمهورها .
وكشفت نيللي خلال الحلقة عن طفولتها في روسيا فقالت:"كنا بننزل مصر كتير، وفي أحد المرات وأنا عندي 6 سنين، كنت بنزل مع والدي نجيب حاجات للبيت، وقتها اللي كان بيسألني اسمك إيه؟ كنت بقول نيللي، فيقولولي ده اسمك الحقيقي، وكنت مستغربة أوي، وده لأن بطلة الفوازير وقتها نيللي كانت مكسرة الدنيا، وكنت ساعتها بضايق اوي" .
وحكت نيللي تجربة تصوير مريرة مرت بها خلال تصويرها لمسلسل ذات فقالت : "بصيت وقت تصوير المسلسل في المرايا وقولت مين الست دي؟ لا بجد مين دي؟ معرفتش نفسي، وجتلي حاجة شبه البكاء، جاتلي خنقة خلال التصوير، وقررت اني أجل التصوير في اليوم ده وروحت البيت وخرجت وقتها مع صحابي بكامل أناقتي لأستعيد ثقتي بنفسي."
وكشفت نيللي عن تفاصيل مسلسلها الرمضاني الجديد واللي أعلنت عن اسمه خلال الحلقة وهيحمل اسم "أنا"، والمنتظر أن تتعاون خلاله مع الفنان شريف سلامة وعدد كبير من النجوم وهينتمي لأعمال الثلاثون حلقة .