يستأنف المذيع أحمد فايق، تقديم الموسم السابع من برنامجه "مصر تستطيع" الخميس المقبل، على شاشة قناة النهار، باستضافة الدكتور نادر حنا أحد أهم الجراحين فى العالم.
وصرح فايق لـ«عين»، بأن هذه الحلقة من الحلقات المميزة التى سجلها فى برنامج مصر يستطيع، لذلك طلب من متابعيه على السوشيال ميديا أن يعيدوا نشر البوست الذى كتبه عن دكتور حنا قائلا: سافر مع والده اللى بيشتغل طبيب إلى نيجيريا ورجع مصر وهو عنده 16 سنة، دخل مدرسة إسماعيل القبانى، بعدها تخرج من طب عين شمس، راح كمل تعليمه فى أمريكا اشتغل هناك عامل فى بيتزا هت، وبعد كده اشتغل سواق تاكسى، أخد الدكتوراه والأستاذية، وبقى واحد من أهم الجراحين فى العالم فى الجهاز الهضمى، مشهور عنه أنه متخصص فى جراحات الأورام المعقدة زى سرطان المستقيم، يعنى العملية بتاعته بتبدأ من 6 ساعات وبتوصل لـ18 ساعة..
يعنى الملاك ده كل ما يدخل غرفة العمليات ينقذ روح بنى آدم، هو اللى أسس جراحة الأورام فى الميريلاند، بقى نجم كبير فى أمريكا لما كان فى مريض بيحتضر فى فلوريدا، المريض كان عنده ورم وتم استئصال الكلية الشمال والورم رجع تانى على الكلية اليمين كل الأطباء فى أمريكا رفضوا يعملوا العملية.
نادر حنا وافق وفى 18 ساعة جراحة قدر ينقذ الروح بأمر الله، تخيلوا بقى واحد زى ده، ثلث عمره عاشه فى نيجيريا ونصفها فى أمريكا، ناجح هناك بيشرف على أربع مستشفيات، تخيلوا بقى وفى هدوء شديد يسافر مصر المعهد القومى للأورام، يعالج الناس الغلابة ببلاش، عمل كده أربع مرات خلال آخر أربع سنوات، يعنى كل دقيقة ليه فى مصر ببسمة ترجع على وجه مريض قالوا له هتموت، يا ريت كده بس، ده بيسافر أسوان وبيعمل كده للغلابة فى مستشفيات الحكومة، كل ده بدون شو أو دوشة.
وستعرض الحلقة الخميس المقبل الساعة 6 مساء على شاشة قناة النهار.
