حرص المطرب كريم صبري، شقيق المطرب رامى صبري على الدفاع عن مجهود شقيقه والرد على اتهام البعض له بنحت أغانى الألبوم الجديد، معلقًا عبر صفحته الشخصية على فيس بوك: "بالنسبة للناس إلى بتتكلم على الأغانى المنحوتة فألبوم رامي.. عايز بس يا حبيب قلبى انت وهو وانتو بتتكلموا متجوش فالهايفة وتتصدرو متبقوش عملين زى إلى مصدق انه مسك فغلطة ومسبهاش مهو لو هنعلق على كل غلطة فالبوم أى فنان مش هنخلص بقا وممكن نتكلم من هنا للسنة الجاية على غلطات ونحت ومزيكا قديمة وحاجات من هذا القبيل كتيييير اوى يعنى لو قارنا البوم #رامي_صبرى على كل المستويات بما فيهم البوماته إلى فاتت هتلاقى حضرتك بتسمع البوم كامل مفهوش غلطة وفى أجيال بتتعلم منه كألحان وكلمات حضرتك بتحبها وبتسمعها وبتحترمها كمان وهتلاقيه بيتكلم على مواضيع موجودة فمجتمعنا محدش فى نجوم بلدك قربلها ومزيكا وألحان جديدة جدا هو بيفضل يشتغل ويتعب فيها ويشيل ويحط علشان تروح سيتك فالاخر تنزل الألبوم ببلاش وتسمعه وانت باشا قاعد على البيلاج أو فبيتك أو مع حبيبتك أو مع صحابك علشان تبقى مبسوط انه قدملك حاجة جديدة فالاخر يعنى هو بيتعبلك انت فالاخر علشان سيتك تيجى فالاخر تتريق اوتمسك فغلطة تافهة جدا ومش مقصودة أنها تبقى منحوتة اكيد ولا هيا فقر مزيكا زى محضرتك قلت".
واستكمل " بس انت متعرفش أن فى حاجة اسمها توارد أفكار دة غير أنها جملة بس إلى بتبقى منحوتة ومبيبقاش واخد باله لأن فى مليون جملة بيالفها وبيشلها وبيحطها علشان زى مقولت سيتك تتبسط والجملة المنحوتة دى بتبقى على مزيكا تانية وخيال تانى خالص هو بيبقى شايفه وسامعه فودنه والدليل انك بتسمع فالاخر غنوة تانية خالص حتى المود والكوردات والهارمونى إلى ملعوب مختلف تماما وانا متأكد ان فى ناس من إلى اتكلمو دول بيلعبو مزيكا وفاهمين كلامى دة كويس جدا بس فى منهم إلى بيحب يورى الناس أنه فاهم وبيحاول يحط التاتش بتاعه وفى منهم إلى عنده مرض إحباط البنى ادمين وخصوصا الناجحين مع انك المفروض بدل الهيافة إلى انت فيها دى تشكره جدا وكتييير اوى على تعبه ومجهوده إلى قعد فيه سنة ونص تقريبا علشان يقدملك فن محترم يليق بيك وببلدك حولو يا أما تقولو كلمة حلوة يا أما تسمعو وانتو ساكتين يا أما متسمعوش خالص وتسمعونى انتو بقا الأغانى والمزيكا بتعتكو الجديدة إلى هتغير من مستوى المزيكا الفترة الجاية دى فالوطن العربى كله وابقو قبلونى لو واحد فيكو نجح نص نجاحه وقدم فن راقى ومحترم الناس احترمته وقدروه واعتبروووه واحد من أهم نجوم جيله من أول البوم #حبيبي_الاولانى إلى كسر مصر والوطن العربى ما شاء الله ووصل كمان لحد اوروبا واجتهد اكتر لحد مكبر وبقى من المهمييين وانت وغيرك بتستنو ألبومه وبتتعلمو منه ".
واختتم "مافيش دلوقتى فنان بيعمل البوم كامل كله قوى كلام وألحان ومزيكا مختلفة وجديدة زى #رامى لأنه بيجتهد وبيتعب جدا وانت وغيرك المفروض تبقوا فخورين بدة جدا لأنه بيمثل بلدك فكل مكان فالعالم.. وأنا بتكلم بصفتى واحد دارس وفاهم الحمد لله كويس جدا وعمرى فحياتى متكلمت ولا رديت على حد فكومنت حتى إلى بيشتمووه لاكن لما الاقى الناس بتتكلم عن حاجة تافهة جدا ومش مقصودة وعملين منها قصة وسايبين التعب والمجهود والاجتهاد والنجاح يبقى لازم افهمهم لأن أبسط حاجة المفروض تشكره على الفن الراقى والمختلف إلى هو بيتعبله عشانك ومن حقك تنقضه وتكلمه كمان بس بزوق بلاش أسلوب المهاجمة والإحباط إلى بتعملوه دة وعلى حاجة تافهة جدا ويا ريتها مقصودة وهو هيرد عليك وهيحترم رأيك يا ريت تركزو فالحلو لأنه اكتر بكتيييير وممتع من الهيافات دى وكلامى واضح ومفهوم جدا ".
