فى لفتة جديدة فكرت الكاتبة والروائية هبه عيسى فى أن تهدى زوجها هدية مختلفة ومتناسبة مع مقدار حبها له فى عيد ميلاده، فأرسلت بريدا إليكترونيا إلى وكالة الفضاء الأمريكية "ناسا" تطلب منهم تسمية أقرب نجم إلى الأرض باسم زوجها والذى يحتفل بعيد ميلاده فى 31 أغسطس الحالى.
قصة حب كبيرة بدأت منذ الجامعة وتكللت بزواج يستمر لعامه السادس على التوالى دفع الروائية هبه عيسى للتفكير فى هدية مميزة والتى قالت لـ "عين": "لسه حالا باعته الرسالة دى لـ ناسا وهو بره لسه معرفش، الفكرة جاتلى لانى تكلمت كتير فى روايتى الأخيرة "أزل" عن الحب الأزلى لروحين عاشوا فى الفضاء ولما نزلوا على كوكب الأرض فى روح منهم قعدت تدور ع التانية، وأحداث كثيرة حصلت، فقلت أأكد وأوثق المفهوم ده عن طريق إنى أحاول اهدى جوزى نجمة من السما فى عيد ميلاده بخطاب من ناسا اللى هى وكالة الفضاء الوحيدة اللى تقدر تعمل".
وأضافت أنه فى حال لم توافق ناسا على طلبها: "هدخل موقعهم وأخد صورة أقرب نجم فى الليلة دى وأكتب عليه اسمه وأطبعها وأبروزها وأبعتهاله مكتبه".
كانت الروائية هبة عيسى كتبت منشورا عبر صفحتها الشخصية بفيس بوك قائلة: "عيد ميلاد أحمد جوزى قرب، ومش لاقيه هدية تناسبه بصراحة على كوكب الأرض أنا بتكلم بجد والله مابهزرش، نمت وحلمت حلم صحيت النهاردة لاقيتنى بدور على موقع ناسا وجبته وبعتلهم الرسالة دي، ويارب يستيجبوا لطلبى قبل يوم ميلاده، طلبت منهم خطاب رسمى بتسمية اقرب نجم للأرض يوم ٣١ أغسطس باسم احمد، عايزه اديله نجمه من السما تكون باسمه، هما بيردوا خلال ١٥ يوم، ادعولى يبعتولى جواب رسمى بصورة أقرب نجم للأرض فى يوم ميلاد احمد ويكون اسم النجم أحمد تونى".
