أغنية «آه لو لعبت يا زهر» التى يرددها الجمهور حاليا فى مصر وكل أنحاء الوطن العربى، كانت سببا فى تحقيقه لشهرة منقطعة النظير خلال فترة قصيرة، هو المطرب الشعبى أحمد شيبة الذى تحدث معنا من مسقط رأسه بمنطقة الماكس بالإسكندرية.
إمتى الزهر لعب مع أحمد شيبة؟
- الزهر لعب معايا بحب جمهورى والناس الغلابة، بس لسه من الناحية المادية ملعبش زى ما الناس فاكرة.
معاك كام مليون دلوقتى؟
- الحمد لله معايا الستر كله، الفلوس مش كل حاجة، أهم حاجة عندى أسرتى، وأولادى.
هل تفكر فى تقديم أغنيات بعيدا عن الشعبى؟
- غنيت مع حسن الشافعى أغنية «ست وشوش»، وكانت شعبى كلاسيك، وحسن الشافعى من الموزعين العمالقة، وشرف ليا ولأى أحد إنه يشتغل معاه، وقريب جدا باجهز أغنية رومانسية هتكون مفاجأة للجمهور.
إيه هو نوع الأكل اللى بتحبه؟
- باحب الملوخية من إيد أمى ومراتى.
معاك عربية دلوقتي؟
- معايا عربية كورى، والحمد لله مكفياني.
عندك إخوات؟
- عندى 4 إخوات، محمود، وشيبة، وفادية، وشادية.
وعندك كام ولد؟
- 5 أولاد هم محمود، ومحمد، وهاجر، ويوسف، ولارا.
من مثلك الأعلى فى الفن الشعبى؟
- عدوية وعبده الإسكندرانى، وكل النجوم اللى غنوا شعبى مميز ومختلف.
ليه بتتكلم فى كل أغنياتك عن الفقر والجدعنة وغدر الأصدقاء؟
- لأن غالبية المجتمع المصرى فئة شعبية ومواقف الفقر والجدعنة تحدث على أرض الواقع باستمرار.
ما هى هواياتك غير الغناء؟
- أحب التلحين ولعب الكورة، وباشجع الاتحاد.
إيه أكتر شىء بيفرحك.. وإيه اللى بيزعلك؟
- بازعل لما حد يستهزأ بيا وبشغلي، وبافرح بولادى أهم حاجة عندى فى الدنيا.
ما رأيك فى أغانى المهرجانات؟
- المهرجانات المنتشرة حاليا نعتبرها ظاهرة، ممكن تختفى وممكن تتطور، لكن مينفعش نقول إنى باحبها كلها، أنا باحب أغانى أوكا وأورتيجا.
بتزعل لما يتقال عليك مطرب أفراح؟
- مش بازعل، أنا مطرب أفراح بغنى عشان أفرح العريس والعروسة، وبعد ما اشتهرت اتطلب منى أبعد عن الأفراح، بس أنا رفضت لأن الناس الغلابة من حقهم يفرحوا.
شايف نفسك فين دلوقتى فى الوسط الموسيقي؟
- أنا باحاول أركز فى خطواتى، وكله فى النهاية بتوفيق ربنا، وأهم حاجة النية.
ليك علاقات فى الوسط الفنى؟
- كلهم أصحابى، وأصدقائى، منهم شعبان عبدالرحيم، وطارق الشيخ، وسمسم شهاب، ومنعم، ومحمود الليثى، وأحمد سعد.
مين هو المطرب اللى نفسك تغنى معاه؟
جورج وسوف لأنه من أكتر الناس اللى باحب أسمعهم، ونفسى أغنى مع محمد حماقى.
بتحب تسمع مين من المطربين؟
- العندليب عبدالحليم حافظ، ومحمد عبدالمطلب.
تفتكر أول فيديو كليب صورته؟
- كانت أغنية «هذا جناه أبى عليا» من تأليف عادل الدقة، وتوزيع محمود حنكش، ومن ألحانى لأنى روحت لملحنين كتير بس طلبوا منى فلوس كتير، وبعد ما سجلتها نزلتها على قناة شعبيات وبدأت الناس تعرفنى أكتر.
إيه هو أول فرح غنيت فيه؟
- أول فرح كان فى إحدى القاعات بمنطقة محطة الرمل فى الإسكندرية.
ما هو أول أجر لك؟
- 20 جنيه وكنت بغنى حوالى 3 نمر فى اليوم.
وإيه هو أجرك دلوقتي؟
- فرق السما والأرض، والحمد لله على كل شىء.
