بمجرد دخول البنت المرحلة الإعدادية، وتبدأ أغلب الأمهات فى شراء جهاز العروسة لابنتها تنفيذا لنظرية "لحقى لمى قبل الغلو"، ولأن هذه النظرية تعتبر صحيحة بالتحديد فى هذه الأيام إلا أن الأم تشترى أشياء لا حصر لها، يكون مصيرها مكانين يا إما الكسر دون قصد أو الركنة للأخت الأصغر.
فالكثير من الفتيات أصبحن يرفضن فكرة شراء جهازهن قبل الخطوبة لأن الموضة تتغير وتظهر تقاليع جديدة على الساحة، فتنفيذا لمبدأ المهم فالأهم، يمكن أن ننصحك ببعض الأشياء التى لا داعى لشرائها بجهازك لأنها زحمة على الفاضى.
- مش لازم تشترى 4 بطاطين، اكتفى باثنين على أقصى التقدير لأنك فى الأرجح لن تجدى مكانا لها.
- كتر الكوبايات فى المطبخ مش شطارة، لأنهم فى الغالب تتعرض للكسر بسبب تكدسها دون داعٍ.
- شراء كميات كبيرة من الكريمات ومستحضرات التجميل، غير صحيحة لأن لها مدة صلاحية.
- لو جوزك مش بيحب الرقص وانتى مش بتعرفى ترقصى مش لازم بدلة رقص.
- النيش ثم النيش ثم النيش، حتى لو قررتى تجبيه هاتى أعداد صغيرة وبلاش تجيبى طقم صينى غالى مش هتستخدميه.
