غضبت الفنانة حلا شيحة من بعض جمهورها ووجهت لهم رسالة عبر صفحتها الرسمية "فيس بوك"، تعبر فيها عن استيائها الشديد بسبب نشر صور قديمة لها على مواقع التواصل الاجتماعى من أفلامها الفنية القديمة، مؤكدة أنها لن تعود لتلك الحياة القديمة نهائياً.
وأشارت حلا أنها تخاف من الله وحده وتتسم بالقوة وتدعو دائماً بالثبات ولست نادمة على أى شىء مر فى حياتها، لأنها كانت وقتها فى سن صغير.
وقالت حلا: "حابة أوضح حاجة بسيطة.. أى حد بيتعمد ينزل لى صورة من أفلامى السابقة على صفحتى لن يستفزنى أبداً بفضل الله والذنب مش أنا إللى حخده ده حيكون كله على الشخص اللى سولت له نفسه الأمر ده".
وتابعت حلا: "أنا بخاف من الله وحده، الحمد لله قوية جدا بالله وحده ثم الدعاء وأدعو الله الثبات فى كل لحظة فى يومى وأنا ذقت الحياة بعيدا عن الله وبالقرب منه ولا أتخيل حياتى أن تعود كالسابق، والحمد لله أنا بنت ناس طيبين وعائلة طيبة ولى فى حياتى السابقة بعض الأخطاء لكن أخطاء بنت فى سن صغير شىء وارد ولابد منه".
وأشارت: "الإنسان يخطئ ولابد أن يخطئ وإلا فكيف يعرف الصواب، لست نادمة على شىء مر من حياتى، لأن كل ما مضى قادنى إلى الله ومحبته والتعلق به الدنيا دار اختبار لكل الناس إحنا جينا هنا لحكمة عظيمة ولهدف".
وأوضحت حلا: "لو الإنسان مسألش نفسه وحاسب نفسه كل فترة حيعيش كدة وخلاص.. لازم نسأل نفسنا إحنا مين وهنا ليه وإيه السبب فى وجودنا، أسئلة غيرت حياتى وحياة ناس كتير، واللى بيسأل بصدق غير اللى بيضحك على نفسه بشوية أوهام تريحه وحيصدقها وخلاص، علشان كدة بقول لأى حد بيحاول يأذينى على الصفحة أو يقول كلام عنى بيحاول بيه يضايقنى..أقوله متحاول معايا وصعب تعرف لأن مصدر قوتى وصبرى واستمرارى فى طريقى من الله القوى المتين الجبار العزيز، اللى لو كنت تعرف قدره مكنتش حتى فكرت أنك تأذى نفسك أيوه أنت فعلًا أذيت نفسك أما أنا ففوضتُ أمرى إلى الله والله المستعان على ما تصفون".