كشفت الفنانة سما المصرى عن كواليس علاقتها بالراحلة الفنانة آمال فريد فى تصريحات خاصة لـ"عين" قائلة: آخر مرة قابلتها قبل ما تتنقل المستشفى الله يرحمها وكنا علطول بنتقابل فى الكافية اللى تحت بيتها فى الزمالك، وكانت بتشتكى من الوحدة ويمكن دا اللى جاب عندها مرض الزهايمر وكانت دايما بتحب تشرب لبن كتير، ولما كنت بحاول أجيب لها عصير كانت تقولى هى بتحب بياض لون اللبن عشان بيفكرها بزمان وصفاء قلوب أهل زمان، وكنت أقولها أنتى تعرفينى كويس كانت تقولى أنا هابقى مشروع نجمة بس لو بعدت عن السياسة، وقالتلى أن الاستايل بتاعى من استايل نجمات زمان مش ستايل الممثلات اللى بتشوفهم الأيام دى على الشاشة، وقالتلى مرة حاولى تمثلى مع كريم عبد العزيز أو أحمد السقا هم فى نفس طولى مش عارفة عرفت أزاى، وقالتلى لو انا كنت موجودة زمان كنت مثلت مع رشدى أباظة أو أحمد مظهر...الله يرحمها..
المرة الأخيرة كنت أنا هسافر دبى عشان إقامتى وكانت زعلانة من الصور اللى نزلت لها فى الإعلام، وقالت إنها حافظت طول الفترة اللى فاتت أن محدش يشوفها كده بس جلوسها فى الكافيه خلت ناس تصورها من غير ماتستأذنها، ونشروا الصور ودى كانت البداية والنقابة محدش كان بيسأل عليها منهم إلا لما تعبت والموضوع بقى رأى عام وعشان كده ودوها مستشفى وهى ماكانتش عايزة تروح المستشفى، قلت لها لما ارجع من دبى هجيلك بس يا خسارة جيت اتلهيت فى الأغنية بتاعت كأس العالم والصيام ورمضان ونسيتها خالص وزعلت لما عرفت خبر وفاتها من قبل ما أشوفها قبل ماتموت...هتوحشنى والله كانت أرق مخلوقة وماكانش لها دعوة بحد وفى حالها، وكانت بتقعد تحكيلى عن إزاى دخلت الفن ورفض أهلها للموضوع دا وهى كانت 16 سنة، وإزاى كانوا النجوم زمان بيحبوا بعض وبيحبوا الفن عشان الفن مش عشان الفلوس...ربنا يرحمها ويثبتها عند السؤال وأنا زعلانة أوى أن مفيش عزاء هيتعملها مع أنها عمرها ما جابت لى سيرة أنها هترفض العزاء لما تموت دى كانت بتحب الحياة جدا ومتفائلة أوى....هتوحشنى جدا والله.
يذكر أنه فى ساعة مبكرة من صباح الثلاثاء 19 يونيو أعلن المتحدث الرسمى لوزارة الصحة والسكان د.خالد مجاهد، وفاة الفنانة آمال فريد فى مستشفى شبرا العام.