داخلين على الجامعة العالم السحرى لبتوع سنة أولى بتكونى بتودعى خلاص الحصة وجرس الفسحه والواجب.
1- خلى لبسك دايما بسيط ومريح وفى نفس الوقت منمق وألوانه مريحة للعين، التيشرت القطن من الحاجات المناسبة جدا فى الجامعة والبنطلون الجينز باللون الأزرق.
2- full makeup من الحاجات المزعجة فى الجامعة وبتدى اللى قدامك انطباع إنك جاية تستعرضى، اكتفى بـsunblock وfoundation خفيف وبلاشر بدرجة matte تليق على لون بشرتك ده ها يخليكى تبانى طبيعية أكتر.
3- لازم يكون عندك كذا جزمة مريحة sneakers ابعدى عن الـheels علشان تقدرى تتحركى براحتك وابعدى عن الحاجات المكشوفة لأنها هتلم تراب ورجلك هاتبان بمنظر سخيف آخر اليوم.
4- لو محجبة ابعدى عن لفات الطرحه الغريبة والمكونة من طبقات كتير اكتفى بايشارب خفيف يفضل يكون قطن بلون هادى لايق على لون لبسك بلاش والنبى شغل لفة الهدية الفاخر ده.
5- خللى بالك من خامه لبسك لازم تكون مريحة وبتمتص العرق وابعدى عن الخامات اللى بتحتاج مكوى زى الكتان والبوليستر والحراير إحنا اصلا بنبقى صاحيين الصبح مش شايفين قدامنا.
6- خللى دايما عند شنطة كبيرة علشان تقدرى تلمى فيها كل حاجاتك وادواتك احساسك ان حاجاتك كلها فى مكان واحد وانك مش شايله حاجات كتير حيديكى سهوله فى الحركة.
7- خللى فى الشنطه بخاخ فى فيه ميه مخلوطه بميه ورد وكل شويه تقدرى تطليعها تبخى منها بختين على وشك حتديكى إحساس fresh وانتعاش فى يوم الجامعة الطويل.
8- خللى عندك ساعة من اللى حجمها كبير وأساور ملونة بألوان مبهجة اللى بتناسب سنك.
9- حافظى على نضافتك الشخصية وجمال ضوافرك وريحتك دى حاجة جذابة أكتر بكتير من الميك اب.
10 - خلى بالك من تصرفاتك وشياكتها امدحى زمايلك بس طبعا من غير تطبيل ابعدى على قد ما تقدرى عن القيل والقال والحورات والرغى الكتير خليكى مبتسمه فى وش الناس بلاش البوز الكشر وتصدير الطاقه السلبيه للناس.