تحولت الصفحات الرسمية للفنان محمد فؤاد من تقديم التهنئة له بمناسبة عيد ميلاده الذى يوافق اليوم الخميس 20 ديسمبر إلى ميدان لإعلان ثورة الغضب ضد فنانهم المفضل، بسبب التأجيلات المستمرة لألبومه الجديد "سلام" الذى أعلن منذ فترة استقراره على طرحه تزامنا مع عيد ميلاده، لكن فؤاد كعادته لم يفِ بوعده ووصل الأمر إلى وصف ألبومه من قبل جمهوره بـ"الفنكوش".
آخر تصريحات فؤش عن سبب تأجيل الألبوم قال فيها إنه يسجل 3 أغنيات جديدة لضمها للألبوم الجديد وأن هذا سبب التأجيل، لكن لن تمر 2018 إلا وقد طرح الألبوم، الذى من المفترض أن يحمل اسم "سلام"، لكن هناك أنباء عن نية فؤاد تغيير اسم الألبوم بعد انتشار أغنية "سلام" التى قدمها فى أحد حفلاته.
فؤاد طرح برومو أغنية "سلام" فى شهر أغسطس الماضى وكتب على الفيديو "coming back soon"، ومرّ ما يقرب من 4 شهور ولم يطرح الألبوم، مما عرض أغنياته للتسريب الذى تضمن مقاطع من أغنيات "سلام، راضية بحالى، سوء تقدير" ضمن 12 أغنية يستعد فؤاد لطرحها فى الألبوم.
لم تتوقف التسريبات لمقاطع من أغنيات الألبوم بل وصلت لنشر أغنيات كاملة من ضمنها "فى حضنك، وسوء تقدير، عيبى، خلينا أخوات".
وتتضمن تسريبات ألبوم فؤاد أغنيتين بعنوان "خلينا أخوات وعيبى" نفصح عن كلماتهما فى السطور التالية...
خلينا أخوات
أحكيلك عنها أقولك إيه غير إنها هى.. اللى أنا حبيتها وحبها سر وعايش فيا
مكانتش بتحكى ومطمنة فى الكون غير ليا
كانت تحكيلى على حب جديد بسهولة كدة عادى.. وأبقى هموت هتجنن منها وأعمل فيها هادى
بتعذب من يوم ماعرفتها وده حالى يوماتى
عايش أيامى كأنى وحيد وبجد عانيت.. والناس بتلومنى العمر بيجرى وليه خبيت
طول عمرى بخاف من اليوم ده يجى وأبعد وأنساه
جربت أنساها بغيرها وأقول كان ماضى وفات.. توحشنى أروح أتمنى أشوفها لو فى سكات
أرجع وأصارح نفسى وأقولى "خلينا أخوات"
أحكيلك عنها أقولها إيه غير إنها عمرى.. عمرى اللى أنا عشته وبحلم بيه ومغلوب على أمرى
أيام بليالى مشفتش نوم ولا جه يوم زارنى
أصعب إحساس لما بكون ناوى خلاص هصارحها.. أرجع فى كلامى وأقول لو قلت أكيد هخسرها
ما هو لو بان حاجة فى عنيها كان قلبى أكيد فسرها
عايش أيامى كأنى وحيد وبجد عانيت.. والناس بتلومنى العمر بيجرى وليه خبيت
طول عمرى بخاف من اليوم ده يجى وأبعد وأنساه
جربت أنساها بغيرها وأقول كان ماضى وفات.. توحشنى أروح أتمنى أشوفها لو فى سكات
أرجع وأصارح نفسى وأقولى "خلينا أخوات"
عيبى
عيبى إنى.. إنى جوة عيونى شيلتك.. كنت دايما أعلى قيمتك
مقبلتش أجى على كرامتك وأحترمتك
كنتى كل ما تحبطينى بتلاقينى لسة باقى
لسة ليكى فى قلبى مطرح لسة طيب من غبائى
بس علمتينى حاجة بعد ما كسرنى التعب
إن مش كل اللى يلمع قصاد عيونا يكون دهب
وغلطتى.. كنت لازم أعيش معاكى بألف وش وألف لون
كنت لازم أوصلك فى الحيرة لحدود الجنون
كنتى كل ما تحبطينى بتلاقينى لسة باقى
لسة ليكى فى قلبى مطرح لسة طيب من غبائى
بس علمتينى حاجة بعد ما كسرنى التعب
إن مش كل اللى يلمع قصاد عيونا يكون دهب
وأنا بنسحب.. مش هقولك أنتى عندى من اللحظة دى بقيتى فين
الحكاية أنا قولتهالك فى البداية فى كلمتين
عيبى إنى.. إنى جوة عيونى شيلتك.. كنت دايما أعلى قيمتك
مقبلتش أجى على كرامتك وأحترمتك
فؤش صاحب تاريخ كبير فى تاريخ الأغنية المصرية الحديثة، وتسببت كل هذه التأجيلات لألبومه الجديد فى اهتزاز الثقة بينه وبين جمهوره الذى ينتظر ألبومه بفارغ الصبر، لذلك فأى تأجيل جديد فى موعد طرح الألبوم ليس فى صالح نجم كبير بحجم فؤش.