أصدر محرك البحث Google تقريره السنوى "البحث هذا العام"، الذى يتناول عمليات البحث خلال عام 2018، ويقدم لمحة عن أهم المواضيع التى بحث عنها المصريون خلال عام 2018، وجاء فى المرتبة الأولى مهرجان "لأ لأ"، الذى قدمه فريق "الصواريخ"، وعلى الرغم من طرحه فى نهاية عام 2017، إلا أنه احتفظ بالصدارة طوال عام 2018، وجاء فى المركز الثانى مهرجان "أنا جدع" ، ويستمر البحث مهرجان "ألعب يلا"، الذى ظل فى قائمة الأعمال التى تم البحث عنها عام 2018.
وعن رأى شعبان عبد الرحيم فى أغانى المهرجانات وهو الفنان الذى اشتهر بأداء لون غنائى موحد، اعتمد فيه على لحن ثابت وملابس مبهرجة متعددة الألوان، قال: "أى حاجة وأى كلام".
"العيال بتوع المهرجانات بيشربوا إستروكس وفودو.. وبيقلعوا ملط وفى إيديهم السنج.. ولو كشفنا عليهم هنلاقى عليهم قضايا"، هكذا وصف شعبان مطربى المهرجانات، مضيفا : "العيال دى بتقول يا إما نجيب توك توك أو نعمل مهرجان.. يجيب التوك التوك ماينجحش يقوم عامل مهرجان ويتخانق مع أهله عشان ياخد فلوس يغنى بيها".
وعن أغانى بيكا وشطة، قال شعبان لـ"عين": "مين بيكا ولا عفريتة ده ! أنا معرفش العيال السوابق دى".
وواصل "شعبولا" حديثه عن مطربى المهرجانات: "دلوقتى كل اللى معاه 500 جنيه بقى يعمل أغنية ويذيعها فى محطات مش محترمة.. الواد من دول يطلع يرقص عريان وماسك مطواة فى إيده".
ودافع شعبان عن الأغنية الشعبية قائلا : "الشعبى طول عمره محترم والدليل محمد رشدى وأحمد عدوية وعبد المطلب.. لكن أغانى المهرجانات مينفعش تخش البيوت.. ميصحش واحد يقول أزقه زقة وأطلع أجرى.. ده مش شعبى".
واختتم شعبولا: "بحب أسمع شيبة والليثى وعبد الباسط حمودة وحكيم وطارق الشيخ.. والكويس هيعيش والوحش هيموت.. الناس بس بتحب تشوف بيقولوا ايه".