فى ذكرى ميلاده الـ87.. ماذا قال عمر الشريف عن فلوسه من السينما.. حلال ولا حرام؟

87 عامًا تمر اليوم، على ميلاد الفنان العالمى الراحل عمر الشريف، الذى ولد يوم 10 أبريل عام 1932، قدم خلالها العديد من الأدوار الفنية سواء فى السينما المصرية أو العالمية، التى ما زالت عالقة فى أذهان المشاهدين.

"أنا مبحبش الفلوس، أقولك الحقيقة، معنديش علاقة بالفلوس، أنا تساءلت ليه، أول حاجة وأنا صغير أمى كانت بتدينى فلوس متعبتش فيها، تانى حاجة أنا بيتهيألى بيدفعولى فلوس على الفاضى، طول عمرى مقتنع إنى ازاى بكسب كل الفلوس اللى أنا بكسبها علشان بحفظ كلمتين وأروح أقولهم قدام الكاميرا، مش مقتنع إنها فلوس حلال".

وأوضح الشريف: "بيتهيألى إنها فلوس حرام، لما بشوف الناس اللى حواليهم وفيه اللى تعبان واللى عبقرى واللى ميت من الجوع، يعنى عشان بعمل بلياتشو قدام الكاميرا بالمبالغ الفظيعة دى بالنسبة لباقى الناس، أنا محبش أخلى فلوس فى إيدى، معتقد أن الفلوس دى مش رزقى أنا، لكن رزق الناس اللى حواليا واللى بيستنفعوا من الفلوس بتاعتى، أنا بحب أوزع فلوسى على الناس دى، ربنا بيبعتلى رزقهم من خلالى".

وأشار الشريف خلال الحوار، أنه كان دائمًا الأول على الفصل فى المدرسة من غير ما أذاكر، كنت بعتمد على ذاكرتى، المدرس يشرح الدرس "يلزق" فى مخى على طول، وفى الامتحانات كنت بفتكر المدرس قال إيه.

قال عمر الشريف إن علاقته بصالح سليم قديمة جدًا من قبل دخوله الفن، حتى بعد زواجهما ظلت تربطهما علاقة عائلية وصداقة قوية.

وأضاف الشريف أن سليم هو من جعله يحب كرة القدم ويشجع النادى الأهلي، لافتًا إلى أن ابنه طارق تربى مع أولاد سليم؛ خالد وهشام.

وأشار الشريف إلى أنه عندما سافر للخارج، كان سليم يسافر له، وكان يراه دائمًا فى فرنسا وظلت الصلة بيهما قائمة ولم يفترقا.

 أجرى الحوار الإعلامى طارق حبيب.