قال الفنان زكى فطين عبد الوهاب فى تصريح خاص لـ "عين"، اكتشفت إصابتى بمرض السرطان من حوالى 4 شهور، وعملت سلسلة من الاشاعات والتحاليل بشكل كتير جدا واتأكدنا انه سرطان فى الرئتين الفص الأيمن والفص الأيسر، وانا حاليا بتعالج داخل مستشفى المعادى للقوات المسلحة.
وأضاف، انا عملت جلستين حتى الان وكل 3 اسابيع عندى جلسة، بس انا الحمدلله بخير ونفسيتى بخير وقدر الله وما شاء فعل، والسرطان لم يؤثر على واتعاملت معاه كأنه صاحبى، لأن مش هينفع أفقد الأمل فى ربنا وأدخل فى حالة إكتئاب، انا الحمدلله بخير وبنزل الشارع وبقابل الناس وبقابل كمان أصحابى، وحتى لو جالى شغل هانزل واعمله عادى.
وتابع: أنا بتوجه بالشكر للدكتور أشرف زكى نقيب المهن التمثيلية لأنه وقف بجانبى وقفة لن أنساها فى حياتى من خلال النقابة، وبشكر الفنانة العظيمة نادية لطفى لأنها ساعدتنى فى العلاج داخل مستشفى القوات المسلحة، لان الكل عارف ان تكاليف علاج المرض ده قوية جدا ومرتفعة فبجد بوجه لها الشكر على اللى عملته معايا
وطالب جمهوره بالدعاء له، مؤكدا مش عاوز الناس تزعل وكفاية انها تدعى ليا بس، وفاروق الفيشاوى لما اعلن انه مصاب بمرض السرطان قال انه بيتعامل معاه كأنه برد، انا بتعامل معاه كأنه زغطة، ان شاء الله اكون بخير بقدرة ربنا ودعوات الناس.
وكان الفنان زكى فطين عبد الوهاب، أعلن إصابته بمرض سرطان الرئة خلال حسابه الشخصى على موقع التواصل الاجتماعى "فيس بوك"، ونشر صورة له وعلق عليها قائلا، "أصدقائي الأعزاء دي صورتي، دي مش نيولوك ولا حاجة، أنا اكتشفت إني عندي سرطان بالرئة من شهر بس، أنا تمام وبتعالج، وبتعامل مع مرضي زي الفنان فاروق الفيشاوي ما قال إنه دور برد وهيعدي.. وأي مريض سرطان لازم يتعامل معاه بنفس المنطق".