في لافتة إنسانية استجاب الفنان أحمد السقا لطلب الفتاة غادة رجب والتي تعاني من مرض نادر، وتحدث معها بعدما أعلنت عن رغبتها في ذلك.
وقالت غادة في حسابها عبر موقع التواصل الاجتماعي "فيس بوك" " يا ناس، أحمد السقا كلمنى، مش قادرة أصدق نفسى أقسم بالله إنسان فى منتهى الذوق والرقى والاحترام والتواضع حاجة مبهجة بجد"،
"السقا: السلام عليكم ازيك يا غادة عاملة ايه
أنا: تمام جدا حضرتك بس مين معايا معلش
السقا: أنا أحمد السقا
أنا: بجد
السقا: أيوه والله ومبسوط جدًا إنى بسمع صوتك والله وإنى بطمن عليكى ودوختينى جدا على رقمك على فكرة
أنا: أقسم بالله أنا الأسعد بصوتك ودى حاجة تشرفنى جدًا بجد، والله ما مصدقة نفسى
السقا: عايزينك تجمدى كده وبأذن الله ربنا هيشفيكى يا قمر وتقوميلنا بالسلامة يا رب
أنا: اللهم أمين يا رب ربنا يسمع منك هو ممكن أبقى أتواصل معاك على الواتس بعد كده
السقا: أيوه طبعًا اكيد دى حاجة هتشرفنى والله واؤمرى لو عايزة أى حاجة والله"
ولم تكن هذه مجرد محادثة بين فنان وأحد معجبيه، بل تكاد تكون إحدى طرق علاج لهذه الفتاة التي تعاني من مرض نادر كما وصفته هي، ورفع روحها المعنوية لمواجهة المرض لأنها قالت في منشور لها قبل مكالمة أحمد السقا بيومين:
"عدى 58 يوم على خروجى من المستشفى ولسه مفيييش أخبار! اتصلت بالدكاترة انهارده للمرة الأخيرة وبردوه مفيش أخبار! هل لو حد مكانى دلوقتى هيبقى رد فعله ايه وهو كل يوم حالته تسوء اكتر! أرجوكم مش عايزة حد يقولى اصبرى وتفاءلى واننا بنتعلم منك القوة ..أنا إنسانة..إنسانة ضعيفة جدًا ومريضة ومش قوية خالص كل اللى قدرت أعمله انى حولت الوجع لابتسامة أمل وبس، أنا أقسم بالله ليا علاج بجد وتم اثبات ده فى الحلقة اللى ظهرت فيها وبأسامى الدكاترة، إيه سبب التأخير ده كله، أنا بجد معدتش عارفة أعمل إيه ولا حتى أفكر..صبرنى يا رب، لكن أنا اقسم بالله ما هسكت عن حقى فى علاجى ومش هسيبه، سامحونى لو حد بعت رسايل وانا مردتش بس انا بجد مش هقدر اكلم حد ومش عايزة حد ينتقد كلامى وان ازاى اقول كده لان جوايا كمية غضب شديدة وربنا ما يوريكم كسرة خاطر حد كل امنيته علاج بس".
