قال المطرب محمود العسيلى، إن السبب وراء "نرفزتى" فى حفلة "انت معاك واسطة"، أن هذا الشخص من منظمى الحفلة، رغم أنه من المفترض أن يقوم بواجبه، وينظم الأمور فى الحفل.
وأضاف العسيلى، فى الحلقة الثانية من برنامج "شيخ الحارة والجريئة"، مع إيناس الدغيدى: بقالى 3 سنين بعمل أغانى مع أحد البنوك، العام الماضى قدمت الأغنية مع مدحت صالح، ونجحت، ثم هذا العام مع بهاء سلطان، وكل ما يتردد أن تعاقدى مع هذا البنك لأن المخرج هشام فتحى صديقى، شائعات، فإدارة البنك تثق فىّ، ويسندون لى هذا العمل، والحمد لله لم نخذلهم.
أما عن دفعه لـ2000 يورو كفاتورة فى أحد مطاعم باريس، قال محمود العسيلى، "بحب أدور على أحلى مطاعم فى أى مكان بسافره، وفى باريس دخلت أحسن مطعم فى العالم، ولكن الفاتورة كانت تقيلة شوية".
وبالنسبة لعلاقته بالصحفيين، اتهم شيخ الحارة، محمود العسيلى بأنه "مغرور"، ليرد العسيلى: "عندى أصدقاء صحفيين كتير، أنا بشوف أن كل واحد لازم يشوف شغله.. فى ناس بتتصل بيا بس أنا حقى انى ماردش، علشان فيه مدير أعمال بيرد على التليفونات، ودى وظيفته وأنا مش هقفل بابى فى وش حد، ولو حد بعت على إيميلى وأنا ماردتش أبقى نص كم".
كما واجه العسيلى اتهاما آخر بأنه سافر مع خطيبته فرنسا دون زواج، ليؤكد العسيلى المعلومة قائلا: "آه سافرنا ألمانيا وفرنسا ولبنان وإسبانيا وتركيا، ولكن كنا مع أصحابنا فى رحلات وبنتفسح".
وأكد العسيلى: "ماحصلش إنى اتقدمت لحد واترفضت، ولكن حصل إن قلبى اتكسر قبل كده، وأعتقد ٣ جوازات كتير أوى على سنى، بس الثالثة تابتة".
كما أكد محمود العسيلى أن حديثه عن الكورونا فى إحدى التغريدات له على تويتر، فهمت بشكل خطأ، قائلا: "ماقولتش إن كورونا وهم، قلت إنها خدعة كبيرة فى البشرية، كنت بتكلم عن حجم الخوف والهلع غير المبرر، بالكورونا قعدنا ٤ مليار شخص فى البيت، والحكومة المصرية ماببتعاملش بهلع وخوف، بالعكس اتعاملت بطريقة خلتنا نفتخر بحكومتنا".
وتابع خلال برنامج شيخ الحارة، أغنية "علشان تبقى تقولى لا" بتاعت تميم يونس مش بتاعتى، وأنا استفدت بإنى طلعت فيها وشرف ليا إنى أطلع فيها، ولما عمل الأغنية اللى قبلها "انتى أى كلام" قولتله أنا معاك فى اللى جاى، وأعتقد إنها عبقرية بس هى مش أغنية، لأنها بتلعب على المحتوى.
وأضاف العسيلى، بتفرج على مسلسلات رمضان، وفيه حاجات كتير عجبانى، لكن كنت قلت إن ٣٠ حلقة ممكن يأثروا على المحتوى، ولو اتعملت ١٥ حلقة هيبقى أفضل، والمشكلة إننا بنتفرج على مسلسلات بره وعارفين الإيقاع السريع، وأنا شخصيا أتابع "الاختيار والبرنس وب١٠٠ وش والفتوة"، وأنا شخصيا مابغنيش تترات خالص غير مرتين".
ووجه العسيلى رسالة إلى ابنه قائلا: "ابنى على مش بعيد عنى، أنا موجود فى حياته بشكل كبير، وبيبات عندى يومين تلاتة فى الأسبوع، وهيتم ١٠ سنين فى أغسطس اللى جاى وأقول له "أنا دايما فى ضهرك وسندك"، وعن والده قال: "كان مؤثر فى حياتى وعلمنى حاجات كتير".
