كفاية يا طيب جلد فى ذاتك؟
حرمت نفسك من جميع ملذاتك
ومستنى الناس تشكر صنيع إيدك
ده يوم ما نطقوا.. نطقوا يطلبوا سكاتك
وعجبى
حنيت لأيام الطفولة جريت ركبت مرجيحة
شفت الدنيا من فوق قلت القعدة على القمة مريحة
نزلت تانى لتحت قوام.. قوام
قلت.. أدى حال الدنيا للى بيرجى النصيحة
وعجبي
بنيت لى بيت بألف باب فوق جبل عالى
وقلت لا هسأل عن حالكم ولا تسألوا عن حالى؟
شهر والتانى ولقيت لى ألف جار وجار
وكل حكاية يحكوها تقطع من تانى فى مصرانى
وعجبى
قالوا.. أيه أصعب ماشفت يا ابن أدم من الزمن؟
قلت أنا.. موت الأم هو أصعب المحن
ولما بصيت لسوريا وليبيا واليمن.. قلت
أصعب من أى صعب أنك تعيش بلا وطن
وعجبي