قالت لمياء أحمد راتب، والدى كان بيعتز بكل أعماله مع النجم الكبير عادل إمام، وخاصة مسرحية "الزعيم"؛ لأنها كانت بتتعرض فترة طويلة، وفيلم "واحدة بواحدة"، وكان بيضحك من قلبه ويفتكر كواليس التصوير، وهو بيعتز جدا بصداقة عادل إمام.
وأضافت لمياء، خلال استضافتها بصحبة الناقد طارق الشناوى، فى برنامج "الحياة اليوم" للإعلامية لبنى عسل، المذاع على قناة الحياة، لما والدى بيتفرج على حاجة له فى البيت كان بيبص فى عيوننا عشان يشوف رد الفعل، وإحنا كنا بنحب مسلسل "أم كلثوم"، وهو كان مبدع فى كل أعماله حتى فى فيلم "خيال الضل" عشان الدور أنه أعمى كان بيمشى فى البيت وهو مغمض العين عشان يتدرب على الدور.
وتابعت، والدى عمره ما فكر يعتزل، ولما كنا بنتكلم معاه عن فكرة الاعتزال كان بيرفض رفض تام، ويقولنا لما أموت اعرفوا إنى اعتزلت الفن، وللأسف هو مشافش آخر أعماله اللى هى "فيلم مولانا" ومسلسل "الأب الروحى".
ورحل أحمد راتب عن عالمنا يوم الأربعاء 14 ديسمبر، عن عمر يناهز الـ67 عاما، بعد إصابته بأزمة قلبية مفاجئة نُقل على أثرها إلى أحد المستشفيات والذى توفى فيه، وشُيعت جنازته من مسجد الحصرى بمدينة 6 أكتوبر عقب صلاة العصر.