بعد أن نشر المطرب رامى صبرى، أمس، بوست عبر صفحته على فيس بوك يهاجم فيه إحدى شركات الاتصالات المسؤولة عن تسويق ألبومه واتهمها بأنها السبب فى ضياع مجهوده بعد تعب طويل على ألبومه الجديد "الراجل" عاد اليوم ليعتذر.
قال رامى عبر صفحته على فيس بوك: "توضيح بعد صدمتى وصدمة كل الناس اللى اشتغلت على ألبومى الجديد لما سمعنا التسريب امبارح وبالكوالتى اللى اتسرب بيه.. نزلت امبارح بوست أن شركة أورانج هى السبب فى وصول الألبوم للمواقع بالشكل ده لكنى اكتشفت أن شركة اورانج ملهاش علاقة بالموضوع وأنها بتقدم خدمة لعملائها بالاتفاق مع الشركة المنتجة أنهم يكونوا اول ناس تسمع اغنيات الالبوم بتاعى قبل اى حد تانى وكانت الاغانى هاى كواليتى.. وللاسف ان بعض من أصحاب مواقع التزوير والقرصنة استغلوا الخدمة ورفعوا الالبوم وسربوه بالكواليتى السيئ اللى سمعتوه وضيعوا تعبى وتعب كل الناس اللى اشتغلت على الالبوم بقالها سنة ونص بداية من المؤلفين والملحنين وشركة مزيكا اللى انتجت الالبوم علشان يطلع باحسن شكل واحسن كوالتى وشركة اورانج اللى اشتغلت معانا وحاولت تميز عملائها وتسمعهم الالبوم قبل اى حد تانى".
وتابع: "الناس دى بتدمر تعب ناس كتير وبتدمر صناعة كاملة.. مجهود وفلوس بتروح على الارض كم الاحباط اللى عيشته امبارح بعد لما سمعت التسريب وحسيت ان كل حاجه عملتها ضاعت فى لحظه مش انا بس كل الناس اللى اشتغلت على الألبوم، وأكرر أن شركة أورانج ليس لها علاقة بموضوع تسريب الاغانى وانها قامت بكل الجهد لتوصيل البومى للجمهور وإنى أكن لها كل الاحترام والتقدير".