أنا المصرى
أنا اللي بتعايق فى جلبابى
ووارث خفة الدم عن أجدادى
وراسم صليب وماشالله على بابى
أنا لا بكره .. ولا بعادى
وسبع تلاف سنة مكتوبة فى كتابى
أنا المصرى
أنا الفلاح الأصيل أبو ضهر محنى
ببدر البذر وأدعى .. يارب فرحنى؟
أنا اللى بتغافل لكن لسانى فصيح
وصالب طولى مهما تنُوح الريح
وبفرق الخير من غير ماحد يلمحنى
أنا المصرى
حافظ تقاليدى وقراية الكُتَّاب
ودارى مفتوحة للصحبة وللأغراب
ولكل عابر سبيل بجود بالموجود
وأسهر ويا أبو زيد الهلالى صباحى
وأشكى الهوى وأقول أصل الهوى غلاب
أنا المصرى
ماسك فى موروثى لكنى عصرى
فى العلم عقلى زى الفرس يجرى
وفى الفن ببدع كما الأجداد
فنون على كل لون يشهدوا لها الأشهاد
أنا المصرى
بزرع وبقلع وببنىِّ وبغنى
لا عمرى قلت يا حرب
لكن نبوتى جار منى
واللى شيطانه يوزه
بقوم له وهيا القومة
والجدع يبقى يخلصه منى
أنا المصرى
أنا اللى بتعايق فى جلبابى
ووارث خفة الدم عن أجدادى
وراسم صليب وما شالله على بابى
أنا لا بكره .. ولا بعادى
وسبع تلاف سنة مكتوبة فى كتابى