هو ليه لما بيرحل عن عالمنا فنان مؤثر بنحزن وكأننا فارقنا عزيز غالى، رغم أننا يمكن ما قابلناش الفنان أبدا ولا صدفة حتى، ده لأن الفنان الحقيقى بيأخد من عمرك لحظات أثرت فيك.. واتوحدت معاه .. وكأنه أنت.. أنت زعلت لما اتظلم وفرحت لما انتصر.. لأنه انتصر لك .. وخد حقك .. لدرجة أنك لو قابلته صدفة ومثلا تجاهلك عن غير قصد.. بتزعل .. لأنه رسب جواك أنكم تعرفوا بعض أكتر من الأخوات.. رحيل الفنان بياخد معاه حتة منك.. من شبابك وأحلامك وذكرياتك.
دلوقتى مع انتشار مواقع التواصل.. لما بتكتب تعليق لفنان وبيرد عليك .. بتفرح لأنه أكد المعنى ده جواك وهو إنكم تعرفوا بعض .. ياما جريت عشان تلحق الحلقة بتاعته قبل ما تتعرض .. وياما وقفت طابور عشان تذكرة لفيلمه، والبنات بتعيش إن بطلها المفضل هو فتى أحلامها وبيبقى نفسها ترتبط بحد شبهه.. لأنه فعلا قريب منها أكثر مما هو نفسه يتخيل.
عشان كدة بطلب من الفنانين ما يكسروش بخاطر حد من جمهورهم كتب تعليق على حاجة هو كتبها .. لأنك مش هتتخيل فرحته بردك هتبقى أد إيه.. وبرضه مش هتتصور حزنه لرحيلك بيبقى عامل إزاى.. أنت بتحفر فى وجدانه وبتأثر فيه بفنك.. اللى بيفضل باقى حتى بعد رحيلك .. لأنه مرتبط بناس عاشت معاك أجمل لحظات عمرها وأسعدها.