بعد انتشار لعبة الحوت الأزرق.. وهلع أولياء الامور على أولادهم.. وكل واحد راح يسأل ابنه أو بنته لو كانت سمعت عن اللعبة دى أو ليها أى علاقة بيها... ووصول بعض من مستخدميها لمرحلة إنهاء حياته بالانتحار.. خطر فى بالى من أجواء اللعبة دى.. ان عندنا ناس.. فنانين وموهوبين تم ركنهم وتم إحباطهم بعدم إسناد أعمال ليهم.. دول فعلا اللى ممكن فى مرحلة ما... يلتهمهم حوت الإهمال وعدم التقدير والإحباط واليأس والاكتئاب الأزرق فياريت نلحقهم.
الفنان محتاج يسمع كلمة تقدير حلوة أو لفتة كريمة يرى فيها معنى من معانى رد الجميل على ما قدمه من فن وإبداع أسعد بيه كثير من الناس... لأن الفنان بيتعامل مع وجدان الناس.. يعنى مش زى مهندس مثلا انجز عمله الظاهر للعيان فبتشكره لما ينهى عمله.. لكن الفنان يخاطب وجدان الناس... فيبقى مش عارف اذا كانت الناس قدرت فنه ولا راح تعبه وجهده هباء.. فالناس دى بتبقى محتاجة كلمه شكرا متعتونا أو نساعد منهم من يمكن مساعدته بإسناد عمل فنى ليه... لان الفنان سعادته وحياته كلها فى شغله سواء فى البلاتوه أو على خشبه المسرح أو خلف ميكرفون الإذاعة... وليست حادثه انتحار الفنان الكوميدى روبين ويليمز ببعيد... فياريت نلحقهم قبل ما نلاقيهم من ضحايا حوت الإهمال والاكتئاب الأزرق.